‘गुथि विधेयक पारित जुइ मखु’

येँ / कार्यवाहक प्रधानमन्त्री ईश्वर पोखरेलं गुथि विधेयक पारित जुइ मफइगु खँ धयादीगु दु । वय्कलं आम नागरिकया सामाजिक व सांस्कृतिक भावना अःखः खनेदुगु गुथि विधेयक गुगुं नं हालतय् पारित जुइ मफइगु खँ कनादिल । म्हिगः येँया ४ वडाय् ग्वसाः ग्वःगु छगू ज्याझ्वलय् न्ववायेगु झ्वलय् वय्कलं उगु खँ धयादीगु खः । वय्कलं गुथि सम्बन्धी ऐन सहलहया निंतिं हःगु खः धासें धयादिल ‘आः हे कानून बने जूगु मदुनि, सहलह जक जूगु खः; जनताया धार्मिक सांस्कृतिक, सामाजिक भावन व एकतायात गुब्सं नोक्सान याये मजिउ, थुकियात सम्मान यायेमाः, जनतां छधी जुयाः सलंसः दँ न्ह्यः न्ह्याकूगु सम्पदायात न्हंके मजिउ ।’ वय्कलं गुथि ऐनयात जनताया हित व भावना अःखः मवनेगु प्रतिबद्धता प्वकादिसें गुथि ऐनं आः हे बर्बाद जूगु स्थिति मदुगुलिं थःपिंसं जनताया हित अःखः गुगुं नं कथंया निर्णय मयायेगु प्रतिवद्धता प्वंकादीगु दु ।

विधयेक विरुद्ध गं थानाः जुलुस
गुथि विधेयकया विरोध यासें म्हिगः नं येँया थीथी थासं जुलुस पिहां वल । थ्वहे वइगु असार ४ गते येँया माइतीघर मण्डलाय् जुइगु प्रदर्शनया लागिं प्रचार यायेत म्हिगः थनया यंगालं गं थानाः जुलुस पिकालसा सुथय् ज्यापु महागुथि नेपालया ग्वसालय् छगू ¥याली पिहां वल ।

ज्यापु महागुथि नेपालं बसन्तपुलिं न्ह्याकूगु ¥याली थःने क्वःने चाःहिलाः बसन्तपुली थ्यंकाः सभाय् हिउगु खः ।
द्वलंद्वः नेवाःतय्सं ब्वति काःगु उगु विरोध ¥यालीइ ‘गुथि विधेयक खारेज या, नेवाः संस्कृति न्हंके दइ मखु, भूमाफिया होशियार, नेवाः एकता जिन्दावाद’ आदि नारा थ्वयेका वःगु खः ।

अथे हे म्हिगः सनिलय् यंगालं गं थानाः व सिटि पुयाः छगू जुलुस पिकाल । राष्ट्रिय पहिचान संरक्षण संयुक्त संघर्ष समितिया ग्वसालय् पिहां वःगु उगु जुलुस येँया थःने व क्वःने लागाय् लाःगु चुक, ननि व बहाःबहिली तकं दुहां वनाः ४ गते ब्वति कायेत माइतीघर मण्डलाय् वा धकाः आह्वान याःगु खः ।

येँया १७ वडां नं म्हिगः जुुलुस पिकाःगु दु । वडाया स्थानीय जनतां स्वतःस्पूmर्त रुपं पिकाःगु उगु जुलुस थीथी थासय् चाःहिउगु खः । उकथं हे ख्वपय् नं सेभ काठमाडौं भ्यालीं म्हिगः विरोध जुलुस पिकाःगु दु । द्वलंद्वःया ल्याखय् पिहां वःगु जुलुसं थीथी थासय् चाःहिउगु खः । उकथं हे बुंगय् नं गुथि विधेयकया विरोधय् प्रदर्शन जूगु दु ।

तोखाय् नं म्हिगः थीथी पुचः जानाः छगू तःधंगु जुलुस पिकाःगु दु । जुलुसं तोखाया थीथी लागा चाःहिउगु खः ।
थ्वहे झ्वलय् नेवाः देय् दबुलिं देय्न्यंकंया जिल्लाया कचायात संसदय् दर्ता जूगु गुथि विधेयकया विरुद्धय् संघर्षया ज्याझ्वः यायेत निर्देशन बिउगु दु । देय् दबूया नायः नरेश ताम्रकारं छगू प्रेस विज्ञप्ति जारी यासें संघर्षया ज्याझ्वः यायेत निर्देशन बियादीगु खः । विज्ञप्तिइ सरकारं गुथियारया हक लाका कयाः नेपाःया संस्कृति परम्परा सम्पदा न्हंका छ्वयेत्यंगुलिं विधेयक खारेज मजूतले संघर्ष मदिकेत निर्देशन नं बियातःगु दु ।

सम्बन्धित बुखँ

LEAVE YOUR COMMENTS