भ्रमण मोदीया, विवाद नेपाःया

छुं दिं न्ह्यः भारतया प्रधानमन्त्री नरेन्द्र मोदीया नेपालय् क्वचाःगु भ्रमणयात थीथी कोणं विश्लेषण यायेगु क्रम जारी हे दनि । प्रधानमन्त्री मोदीं नेपालय् सिमाना लागाया शहर जनकपुरं भ्रमण न्ह्याकूगुयात नं मेगु हे कथं विश्लेषण जूगु दु । जनकपुरय् जूगु नागरिक अभिनन्दन कार्यक्रमय् सार्वजनिक रुपं २ नं. प्रदेशया मुख्यमन्त्रीया अभिव्यक्ति व म्हो जक चर्चा जूगु अभिनन्दन समारोहय् स्वतन्त्र मधेसया प्लेकार्ड प्रदर्शनयात इलय् हे वासः याये मफुत धाःसा भविष्यय् नेपाःयात मलनीगु कैया रुपय् २ नं. प्रदेश ल्यनाच्वनीगु संकेतया रुपय् कायेमाःगु खनेदु ।

थुकियात हल्काफुल्का रुपं कयाः वास्ता मयासे वंसां तत्काल खास हे नेपाःयात लिच्वः मयाःसां थ्व ल्वय् लिपा वनाः क्यान्सरया रुपय् विकास जुल धाःसा लंके मफइगु स्थिति ब्वलनी । नाकाबन्दीया कारणं नेपाः व भारतया दथुइ छगू कथं सम्बन्ध ख्वाउँयाच्वंगु खः । नाकाबन्दीया इलय् प्रधानमन्त्री जूम्ह खड्ग ओलीं नाकाबन्दी लित मकाःतले भारत भ्रमणय् वने मखु धकाः अडान तःगु व नाकाबन्दी लिकायेधुंकाः जक भारत भ्रमणय् वंगु खः ।

थुकिं यानाः ओलीया राष्ट्रवादी छबी कथं नेपालय् लोकप्रिय जुल । थुकिया लबः एमालें वंगु फुक्क चुनावय् त्याकाः कायेखन । उबलेनिसें ख्वाउँयाच्वंगु सम्बन्ध भिंकेत मोदीयात दबाब लानाच्वंगु खः । उकिं वंगु आमनिर्वाचनं एमालेया नायः खड्ग ओली निक्वःखुसी प्रधानमन्त्री जुइगु चिं खने दयेवं हे भिंतुना बियाः खड्ग ओलीनाप सम्बन्ध भिंकेत वय्कः प्रधानमन्त्री मजूनिबलय् हे विदेशमन्त्री सुष्मा स्वराजयात नेपाः छ्वयाः कूटनीतिक पलाः न्ह्याकूगु खः ।

थुगसीया मोदीया भ्रमण मोदीया नितिं नेपालय् थःगु स्यनाच्वंगु छवी सुधार यायेत जूगु कुतः खनेदतसा थ्व भ्रमणयात कयाः नेपाःया राजनीतिक दलयात विभाजित याना थकेत नं मोदी सफल जुल ।

व धुंकाः निर्वाचित प्रधानमन्त्री खड्ग ओलीयात हानं दिल्ली सःताः न्हापा स्यनाच्वंगु सम्बन्ध भिंकेफुगु सन्देश बिल । थुखे प्रधानमन्त्री खड्ग ओली भारतया भ्रमण धुंकाः चीन भ्रमणया तयारी यानाच्वंगु इलय् हे भारतया प्रधानमन्त्री नरेन्द्र मोदी नेपाः भ्रमणय् वयेगु घोषणा जुइवं नेपाःया सरकारयात भचा मछिंका बिउगु अःपुक सीदु ।

भारतीय प्रधानमन्त्रीया नेपाः भ्रमणया तालिका नेपाःया परराष्ट्र मन्त्रालयं स्वयां न्ह्यः भारतं क्वःछिउगु तालिकायात सदर यायेत बाध्य जूगु घटनां थुकी नेपाःया परराष्ट्र मन्त्रालयया भूमिकायात सीमित याना बिउगु घटनाया रुपय् नं काःगु खनेदु । जनकपुरया भ्रमण व नागरिक अभिनन्दन नेपाः सरकारया प्राथमिकता स्वयां भारतीय पक्षया चाहनाया दबाब यक्व दुगु महसूस जूगु खनेदत ।

मोदीया थ्व भ्रमणयात धार्मिक तिर्थाटनया नां बिउसां थ्व राजकीय भ्रमणया रुपय् हे हिल । नेपाः व भारतया उच्चस्तरीय भ्रमणया निरन्तरता कथं हे थुगसीया भ्रमणय् नं सहमति, उद्घाटनत जुल । अझ नं थुकथंया सहमति पुलांगु चांगया द्यःने मेगु चांगया रुपय् तनीगु जकं खःला धइगु नेपाःया शंका दु । थुकथंया भ्रमणया इलय् जूगु सहमतिया इतिहास स्वल धाःसा कार्यान्वयन मजूगु सहमतिया छपाः निपाः जक मखु चांगका चांग हे लुया वइगु अवस्था दु ।

उकिं नेपाःया प्राथमिकता न्हूगु सहमति स्वयां पुलांगु सहमतिया कार्यान्वयनय् तिबः बीमाः धइगु खः । प्रधानमन्त्री खड्ग ओलीं नं थ्व खँयात विशेष ध्यान बियाः पुलांगु सहमतिया कार्यान्वयनय् तिबः बिया धकाः संसदय् मोदीया भ्रमणया बारे न्ववायेगु झ्वलय् धाःगु खः । अथे खयां नं अरुण तेश्रोया शिलान्यास कार्यान्वयनया नितिं खः कि नेपाःया ततःधंगु जलविद्युत आयोजनात भारतं दयेकेगु नितिं मखु ब्लक यायेगु मनसायं ल्हातय् लाकेत जक खः, थ्व भविष्यय् खने हे दइ ।

थ्व शंका छाय् नं यायेमाःगु अवस्था दु धाःसा महाकाली सन्धीकथं पंचेश्वर आयोजनायात न्ह्यःने यंकेगु सम्झौता नेपाः व भारतया दथुइ जूगु नीदँ दयेधुंकाः नं उकियात कार्यान्वयन यायेगु सवालय् भारतया आलटालं ब्वलंगु खः । थ्व जक मखु कि भारतं दयेकेगु धकाः जिम्मा काःगु ततःधंगु छुं हे जलविद्युत आयोजनात कार्यान्वयन जूगु अवस्था मदु ।

मेखे भारतय् लः यंकेत जुइगु थीथी ड्यामया आयोजनात धाःसा फटाफट दयेकेगु जक मखु कि नेपाःयात न्यँ हे मन्यँसे सिमाना खुसिइ ड्याम दयेकाः लः पनेगु, थःयात माक्व लः यंकेगु व समस्या पिदन धाःसा नेपाःनाप मेगु हे सन्धी यानाः पाक्व यायेगु भारतया प्रवृत्ति सुधार जूगु महसूस यायेथाय् मदु । उकिं अरुण तेश्रो आयोजना गुकी गुसः मेगावाट जक मखु कि हाइ ड्याम दयेकेगु योजना नं खः थ्व कार्यान्वयन स्वयां मेपिं वयाः दयेकः वइ धकाः पनेत भारतं काःगु खः कि धकाः शंका यायेथाय् नं दु ।

नेपाः व भारतया स्वापू दथुइ यक्व आयामत मध्ये व्यापार घाटा, नेपाःपाखें भारतय् निर्यातय् जुइगु अवरोधंनिसेंं कयाः सिमानाय् जुइगु डुबान लगायतया यक्व समस्यात दु । थुकथंया समस्याया धलः चीहाकः जुया वनेगु स्वयां दँय्दसं ताःहाकः जुइगु क्रमय् दु । थुगसीया मोदीया भ्रमण सोच विचार यानाः योजनावद्ध रुपं छु कायेगु छु धायेगु धइगु होमवर्क यानाः मोदी वःगु खनेदु ।

थुकिया छुमां धइगु जनकपुरय् जूगु नागरिक अभिनन्दन समारोहय् मोदीं बिउगु भाषण जक मखु कि येँ महानगरपालिकां याःगु अभिनन्दन कार्यक्रमय् तकं छु न्ववाःसा थनया जनतायात प्रभावित याये फइ धइगु अध्ययन यानाः न्ववाःगु खनेदु । स्वनिगःया कला संस्कृति व थ्वनाप स्वानाच्वंगु नेवाः समुदायया बारे तकं थःगु भाषणय् त्वःमफिक न्ववानाः नेपाःया गल्ली गल्लीया राजनीति बारे तकं थः जानकार धइगु क्यनेगु कुतः नं मोदीपाखें जुल ।

थुगसीया मोदीया भ्रमण मोदीया नितिं नेपालय् थःगु स्यनाच्वंगु छवी सुधार यायेत जूगु कुतः खनेदतसा थ्व भ्रमणयात कयाः नेपाःया राजनीतिक दलयात विभाजित याना थकेत नं मोदी सफल जुल । केन्द्र व दुई नम्बर प्रदेशया सम्बन्ध अले पहाडी व मधेसी जनताया विभाजन मदयेगु स्वयां अप्वयेकेत मोदीया भ्रमण सफल जुल । तर थुकिया दोष मोदीयात बी हे मफइगु कथं भूमिका म्हिताः थःगु भ्रमण सफल यानाः मोदी लिहां वन ।