इलेक्ट्रीकल बसया चर्चा नं फुस्कुलुगु लात

स्वनिगलय् आः इलेक्ट्रीकल बस न्ह्याइगु जुल धकाः धुमधमाका साथ उद्घघाटन याःगु समाचार बय्बय् जुल । झीथाय् च्वय्या पदय् च्वंपिनि उद्घघाटन शिलान्यास यायेगु धाल कि सिक्क यः । उकिसनं राष्ट्रपति प्रधानमन्त्रीतय् तकं उद्घघाटन शिलान्यास ज्या जुल कि मिखा तिसिना याः जुइगु प्रवृत्ति दु ।

राष्ट्रपति प्रधानमन्त्री हे वइगु जुसेंलिं मेपि तालुकदार पदय् च्वंपिं नं अथें हे साला हइगु जुल । थुज्वःगु हे कार्यान्वयन मजुइगु घटनाया रुपय् हे जक सीमित जुइगु खः कि धइगु कथं स्वनिगलय् साझां इलेक्ट्रीकल बस उद्घघाटन याःगु ज्यायात कायेमाःगु अवस्था वःगु दु । थुकथंया हे घटनाया रुपय् रानीपूखु पुननिर्माणया शिलान्यास नं लाः ।

छुं नं खँया शुरुवात याये न्ह्यः उकिया तयारी सतही जक खः कि कार्यान्वयन पक्षया अनुसन्धान सहित आधारत तयार यानाः जूगु खः धइगु सीकेमाःगु आवश्यक जुइ । स्वनिगलय् साझां चले यायेगु धकाः उद्घघाटन जूगु बस उद्घघाटन जूगु दिनय् छन्हु पुल्चोकं निसें सिंहदरवार तक न्ह्यात व धुंकाः छक्वः नं मन्ह्यात ।

छुं हे आधार तयार मयासे हथासं लोकप्रियताया नामय् सरकारी नेतृत्वया छ्यं जक ब्वयेगु कार्यक्रम यानाः प्रधानमन्त्री पदया सम्मान जुइ कि हल्का जुइ प्रधानमन्त्रीया सचिवालयया टीमं अनुसन्धान मयाःगु खनेदत । आखिरय् साझां चले याये धकाः उद्घघाटन याकूगु बस न साझा थम्हं हे योजना दयेका हःगु खः न त आधार तयार यानाः हे शुरुवात याःगु खः ।

आखिरय् साझां चले याये धकाः उद्घघाटन याकूगु बस न साझा थम्हं हे योजना दयेका हःगु खः न त आधार तयार यानाः हे शुरुवात याःगु खः । उगु बस ला एशियाली विकास बैंकं लुम्बिनीइ चले यायेत धकाः जकं बिउगु जुयाच्वन । अले साझां उगु बस चले यायेत रुटया अनुमति कायेगु प्रक्रिया तकं न्ह्याकूगु मदुगु जुयाच्वन ।

उगु बस ला एशियाली विकास बैंकं लुम्बिनीइ चले यायेत धकाः जकं बिउगु जुयाच्वन । अले साझां उगु बस चले यायेत रुटया अनुमति कायेगु प्रक्रिया तकं न्ह्याकूगु मदुगु जुयाच्वन । व हे उद्घघाटनया ज्याझ्वलय् प्रधानमन्त्रीं आः स्वनिगलय् इलेक्ट्रीकल बस चले जुइ, छेँय् छेँय् ग्याँस मखु इलेक्ट्रीसिटीं चले जुइगु इन्डक्सन छ्यलेगु धकाः न्ववानाबिल ।

मिडियां नं थुकियात कार्यान्वयन हे जुइगु कथं हेडलाइन समाचार दयेकाः बय्बय् यात । तर थ्व फुक्कया जग दु कि मदु धकाः स्वयेबलय् जग हे मस्वंसे न्यागू तल्लाया छेँ दंगु थें धकाः खनेदत । खः का आः प्रविधिया विकासया कारणं पेट्रोल डिजेलया सवारी साधनत विस्थापित जुया वनीगु चरणय् प्रवेश जुइत संसार वनाच्वंगु दु ।

तर अझ नं इलेक्ट्रीकल भेहिकल पेट्रोलियम पदार्थं न्ह्याइगु सवारी साधनया विकल्पया रुपय् सहज जुइ मफुनि । तर मेगु झिदँया दुने थुकिया अनुसन्धानय् विकसित देय्तसें यानाच्वंगु लगानी, सवारी साधन दयेकीगु तःतःधंगु कार फ्याक्ट्रीतसें इलेक्ट्रीकल भेहिकल उत्पादनया नितिं टाइम लाइन सहित यानाच्वंगु अनुसन्धान व उत्पादन, बेलायत फ्रान्स लगायत देय्तसें समय सिमा तयाः पेट्रोलियम पदार्थं न्ह्याइगु गाडीया प्रतिवन्ध व इलेक्ट्रीकल भेहिकल हयेगु योजनाया कारणं मेगु दशक दुने इलेक्ट्रीकल भेहिकल पेट्रोलियम पदार्थं चले जुइगु भेहिकलया विकल्पया रुपय् विकास जुइगुलिइ विश्वास याये छिं ।

संसारय् वयाच्वंगु थ्व हिउपाः अन्ततः नेपालं नं महयेगुया विकल्प नं मदु । अझ धायेगु खःसा थुज्वःगु प्रविधिया सवारी साधन झीगु थें जाःगु देय् गनं थःगु हे पेट्रोलियम पदार्थया उत्पादनया संभावना मदु, अज्याःगु देशय् माःगु हे प्रविधि खः । झीके दुगु धइगु हे मतः उत्पादनया स्रोत खः । हानं मत उत्पादनय् झीगु देय् छुं दँ दुने अधिक उत्पादन जुइगु अवस्थाय् नं दु ।

थुज्वःगु अवस्थाय् छ्यासछ्यास्ती मतं न्ह्याइगु गाडी नेपालय् चले जुयाः पेट्रोल डिजेल जक झिके याये मफुसां झीगु देय् व जनताया नितिं यक्व फाइदा हे जुइ । तर थुकिया नितिं उद्घाटन यानाः घोषणा यानाः जक जुइमखु । झीथाय् धाःसा ज्या स्वयां खँ अप्वः प्रचार जक जुइगु कथंया प्रवृत्ति दु ।

स्वनिगलय् सन् २०३० निसें चिकं नं चले जुइगु गाडी प्रतिवन्ध तयेगु धकाः ३ नं प्रदेशं नं थःगु नीति तथा कार्यक्रमय् घोषणा यात । घोषणा धुंकाः उकिया कार्यान्वयनया मास्टर प्लान छु दु धकाः स्वल धाःसा फुस्लु । थुज्वःगु गतिविधिं झीगु देय् गुबले थहाँ वनी ?

स्वनिगलय् वा देय् न्यंक हे इलेक्ट्रीकल भेहिकलया मुभमेन्ट अप्वयेकेगु खःसा व कथं हे समयसिमा सहितया मास्टर प्लान हयाः कार्यान्वयन याना वंसा जक चिकं नं चले जुइगु भेहिकलया विकल्पया रुपय् इलेक्ट्रीकल भेहिकल जुइ फइ, मखु धइगु खःसा नेपालय् सन् २०५० तकं नं व हे कुँ पिथनीगु गाडीया बोलवाला ल्यनाच्वनी ।

जाबो प्लाष्टिकया झोला छगू चिइके धालं नं सरकारं चिके मफयाच्वंगु अवस्थाय् सरकार चले यायेत दकलय् अप्वः राजस्व वइगु पेट्रोलियम पदार्थया आयात, गाडीया आयातं वइगु राजस्वया विकल्प छु धइगु नं सरकारं बिचाः मयानीगु अवस्थाय् स्वनिगलय् इलेक्ट्रीकल भेहिकल सरर धकाः धाये अःपु धरहरा तःपु थें जक जुइ ।

सम्बन्धित बुखँ

LEAVE YOUR COMMENTS