येँया फिब्वख्यलय् सद्भाव ऱ्याली

येँ (नेपालभाषा टाइम्स) – सुनसरीया देवानगञ्जय् ब्वलंगु घटना लिपा मधेशय् उत्पन्न परिस्थितियात कयाः मंकाः विद्यार्थी संगठनं येँ सद्भाव ऱ्याली पिकाःगु दु । म्हिगः फिब्वख्यलय् विद्यार्थीतय्सं ‘नापं जानाः देय् दयेके नु’ धइगु नारा सहित सद्भाव ऱ्याली पिकाःगु खः । विद्यार्थी संगठनतय्सं ‘नेपाःमि जि दइ गन दइ’, हिन्दु-मुस्मां दाजु किजा मेपिं मखु न्हा’, ‘जनता सिनाच्वंगु दु, सरकार सुम्क च्वनाच्वंगु दु’ धइगु नारा च्वयातःगु प्लेकार्ड ब्वयेगु ज्या याःगु खः । लिसें सद्भाव ऱ्यालीपाखे देय्न्यंकं हिंसा ब्वमलंकेत व राष्ट्रिय एकता कायम यायेत नं अपील याःगु दु ।

उकथं हे म्हिगः फिब्वख्यलय् नागरिक अपील तथा ऐक्यबद्धता ऱ्याली पिकाःगु दु । देय्न्यंकं द्वन्द्वया घटना जुइवं म्हिगः शान्ति, सद्भाव व सामाजिक एकताया निंतिं धासें नागरिक न्ह्यलुवापिसं ऱ्याली पिकाःगु खः । ऱ्यालीपाखे तराई-मधेशय् खनेदुगु अशान्ति पनेत, धार्मिक तथा साम्प्रदायिक दंगा न्यनावनेगु पाखे देय्यात बचे यायेगु सन्देशमूलक नारा सहित सार्वजनिक अपील याःगु खः ।

ऱ्यालीइ छम्ह नेपाःमिया मंकाः जिम्मेवारी, फुकसिया सम्मान, फुकसिया सरक्षा, फुकसिया नेपाल, विविधताय् एकता, एकता शक्ति थेंज्याःगु नारा च्वयातःगु प्लेकार्ड नं ब्वयेगु ज्या जूगु खः । ऱ्यालीइ थीथी क्षेत्रया नागरिक न्ह्यलुवापिसं ब्वति काःगु खः ।