जुजुयात न्ह्यःने हयेगु खँ

अन्याय याये त्यः अति यायेमत्यः धइथें वर्तमान प्रजातान्त्रिक व्यवस्थाया थीथी नेतातय् अकर्मण्यताया कारणं थ्व इलय् गुलिं नेपाःमि जनता पुलांम्ह जुजु ज्ञानेन्द्रया शरणय् थ्यंका वनाच्वंगु दु । सिन्धुपाल्चोकय् ला जुजु न्ह्यःने वयेमाल धकाः खुल्ला रूपं आह्वान यानाः सार्वजनिक थासय् प्रदर्शन नापं यानाक्यंगु समाचार सार्वजनिक जुयाच्वंगु दु ।

देसय् प्रगतिशील धाःगु थुगु गणतान्त्रिक पद्धति दुने नं थथे प्रतिक्रियावादी शक्ति कथं गणतन्त्रवादीतय्सं कयातःम्ह जुजुयात छाय् न्ह्यःने हयेगु खँ जुल, थ्व धाःसा थौं विचाः मयासें मगाःगु खँ जुइधुंकूगु दु । २०४६ साल लिपा झन् बस्तुया भाः अप्वःगु अप्वयां तुं वनाच्वंगु दु । चीन, क्यूवा, उत्तर कोरिया लगायत थीथी समाजवादी देसय् थुगुसी सामानया भाः गुलि थ्यं, आकिवं इवं झन् म्हो जुइ ।

चीनय् स्वीदँ तक बस्तुया भाः स्थिर अवस्थाय् च्वनाः लिपा लिपा झन् झन् दंका उगु सामान खरिद याये फइगु जुजुं वःगु दु ।झीगु देसय् थौं नितकां न्याये दुगु तरकारी कन्हय् न्यातक थ्यनेधुंकी । म्हिगः न्यातकां लाःगु तरकारी कन्हय् झितका थ्यंने धुंकी । भारतं सामान मवःगु धासें आः ला तरकारी छथुया हे पीतका तकं थ्यनाच्वंगु दु ।

थुकिया कारण छु धका मामां वनेगु इलय् कर अप्वः जूगु, भ्रष्टाचार चरम सिमाय् थ्यंगु व ज्या याना नइपिंत ज्या मदया च्वन नं खरिद बिक्रिया चरण धाःसा उलि हे अप्वः जुया वंगुलिं खः । बजारय् सामानया अभाव जुइवं हे भाः थहाँ वनीगु खः ।

चीन, क्यूवा, उत्तर कोरिया थेंज्याःगु देसय् झन् झन् अप्वः सामान उत्पादन जुइगु व अनया उपभोक्तातय्सं खरिद यानाः उपभोग याःगु स्वयां अप्वः सामान उत्पादन जुइगु व वितरण जुयाच्वनीगु कारणं झन् झन् हे सामानया भाः कुहां वनाच्वनीगु खः । झीथाय् नं माःगु स्वयां अप्वः सामान वा बस्तु उत्पादन अप्वयेके फत धाःसा अवश्य नं सामानया मू थौं स्वयां कन्हय् व कन्हय् स्वयां कंस म्हो जुजुं वनी ।

छपे नयेगु निंतिं जक मखुसें तमाम जनताया सेवा यायेगु निंतिं राजनीति यायेमाः धइगु ज्ञान, सीप व भावना नेपाःया नेतातय्के दयेमाःगु खनेदु । अथे जूसा हे जक नेपाली कांग्रेस व नेकपाया नेता व कार्यकर्तात प्रति जनताया म्हिगः न्ह्याक्वः हे असन्तोष दुसां छसिकथं क्वलाना वनी ।

थन ला तराई, पहाड व हिमालं वःपिं मनूत फुक्कं येँय् वयाः च्वनेत वइगु जुइवं अले भारतं तकं थन तरकारी व फलफूल हयाः खपत याये मालिगु अवस्था जुइवं झन् झन् बस्तुया मू थहाँ वनेगु क्रम जारी जुयाच्वंगु खः । थःगु उत्पादन थःपिंत मगाये धुंकाः तस्कर भ्रष्टाचारी व काला बजार अप्वः खने दया वनेवं भाः थहाँ वनीगु व वर्तमान सरकार प्रति नकारात्मक असर जुइगु स्वाभाविक हे खः ।

उकिं नं न्ह्यागु हे दलं शासन यात धाःसां थ्व इलय् नेपाःमि जनतायात राहत बिइफइगु स्थिति मदु । वार्षिक बजेट दयेकीगु इलय् हे विदेशी अनुदान व सहयोगयात नं दुथ्याका झन् झन् हे विदेशी त्यासा अप्वः जुया वनेवं थन नेपाःमितय् आय श्रोत स्वयां खर्च अप्वः जुइगु व क्रय शक्ति ह्रास जुजुं वनीगु स्वाभाविक हे खः ।

थज्याःगु अवस्थाय् थःगु तुतिइ दनेत तकं थाकुइगु अवस्था ब्वलनीगु अवस्था वयेवं व्यवस्थापन यायेगु निंतिं जुजुयात ग्वाहालि फ्वनीपिं मनूत पिहां वइगु स्वाभाविक खः । म्हिगः अथे मनं तसकं भाः बेसा थिके याःगु रेकर्ड मदु ।

२०१७ सालनिसें २०४२ साल तक पंचायती व्यवस्थाया रजत जयन्ती माने याःगु इलय् तकं प्रगतिशील धाःगु पक्षं भाः थिके जूगु तथ्यांक पित बिउगु इलय् स्वयां आः २०४६ सालनिसें २०७६ साल तकया स्वीदँया दुने बेसाःभाःया धलः पिकायेगु खःसा सर्ग व पाताः पाये धुंकूगु अवस्था थ्यनाच्वंगु दु ।

थज्याःगु खँ छुं अप्रत्याशित घटना मखुसें जनतां गुलि तक सह यायेगु क्षमता दु धइगु जाँच याये थें यानाः थन मनूतय्त खाली सास्ती हे जक यानाः थःपिनि मोज मस्तीं विदेश सयर यायेगु, भ्रमण भत्ता नयेगु वा माःसां म्वाःसां विदेशय् वनाः वासः याकेत वनेगु थेंज्याःगु राज्य कोषया दुरुपयोग यायेगु, शक्ति दुपिसं उकथं दुरुपयोग यानाः थः व थःगु छेँजःया लागिं अकूत सम्पत्ति मुंकेगु ज्या जुयाच्वंगु कारणं थौं वर्तमान नेतातय्गु बिरुद्ध सः थ्वयेकेमाःगु अवस्था वःगु खः ।

राजनीतिया ‘र’ तकं मसिउपिं सांसद व जनप्रतिनिधि जुयाः चले याइगु व्यवस्था स्वयां बरु जुजु हे वःसां जिउ धइगु गुलिं असन्तुष्ट पक्षया तर्क खः । तर थन संविधानय् हे गणतन्त्र वा जुजु हे मदइगु व्यवस्था जुये धुंकूगु व संविधानयन् हे संघीयताया खँ दुथ्याके धुंकूगु अवस्था जूगु ल्याखं चाहे जुयां जक अःपुक थथे जुजुं शासन यायेत वइगु वा देसय् कायम जुइधुंकूगु गणतन्त्र थेंज्याःगु उच्च स्तरया व्यवस्था हाकनं छुं हे मजुइकं अथें पतन जुइगु धाःसा अवस्था हे मदु ।

थ्व ई जनता अन्यौलय् लानाच्वंगु ई खः । थःपिसं हे नार्गाजुन दरवार दुने स्वथने यंके धुंकूम्ह जुजुयात हाकनं ब्वनाः शासन यायेत वा धयाच्वंगु ई खः । उकिं वर्तमान नेतात प्रति थ्व इलय् जनताया घोर असन्तोष दु धइगु धाःसा स्पष्ट जुइधुंकूगु दु । तर प्याः चाल धायेवं विष नयेगु ज्या नं मिले मजू ।

झीसं गणतन्त्र तक थ्यंकेत गुलि यातना फया, कठी, लाठी, जेल नेल अब्ले वास्ता हे मयासें जनतां दुःख सियाःलिं जक जुजु ध्याकुनय् लाःवंगु खः । अबले हे नं थःपिं गुगुं नं इलय् सत्ताय् वयेगु मनसायं हे खइ, जुजुया श्रीपेच वा पगरी राज्ययात लःल्हायेत तयार मजूगु खः । तर नेपाल सरकारं भचा अप्वः संरक्षण याना तइगु मनसायं अबले जुजु ज्ञानेन्द्रं उगु श्रीपेचयात नेपाल सरकारयात लःल्हानाबिल ।

जुजुपिनिगु थःगु क्वसः वा पेवा जुयाच्वंगु थ्व श्रीपेचयात आः हाकनं थःपिसं लाकाः जुजु हे जुयेगु मनसाय वर्तमान ज्ञानेन्द्र शाहपाखें नं प्वंकेगु यानाच्वंगु दु । मनू जूगु कारणं मनूतय् ज्या यायां वनेगु इलय् चाःमचाः खने दइगु स्वाभाविक खः । उकियात शान्त यायेगु निंतिं छु यायेमाः, गथे यायेमाः धइगु ज्ञान नं मनूतय्सं कमे याये फयेकेमाः ।

छब्व छपे नयेगु निंतिं जक मखुसें तमाम जनताया सेवा यायेगु निंतिं राजनीति यायेमाः धइगु ज्ञान, सीप व भावना नेपाःया नेतातय्के दयेमाःगु खनेदु । अथे जूसा हे जक म्हिगः न्ह्याक्वः हे वर्तमान नेपाली कांग्रेस व नेकपाया नेता व कार्यकर्तात प्रति जनताया असन्तोष दुसां छसिकथं क्वलाना वनी ।

सम्बन्धित बुखँ

LEAVE YOUR COMMENTS