भ्रष्टाचारीतय्त कारवाही याये म्वाः ला ?

अति भ्रष्टाचार जुइगु देय्या धलखय् नेपाः न्ह्यःने लाः । थ्व बांलाःगु ला पक्का हे मखुत । भ्रष्टाचारया धलखय् हे न्ह्यःने धायेबलय् गौरब यायेमाःगु खँ नं मखुत । भ्रष्टाचारया ल्वय् आः जक ब्वलंगु मखु पंचायतकाल निसेंया हे ल्वय् खः । थ्व ल्वय् प्रजातन्त्र, लोकतन्त्र, गणतन्त्र व संघीयता वयेधुंकाः नं म्हो जुइगु नां हे काःगु मखु ।

अःखबतं थ्व ल्वय्या संक्रमण फुक्क ख्यः व लागाय् न्यनावंगु खनेदु । थ्व ल्वय्यात नियन्त्रण यायेगु मामिलाय् राजनीतिक नेतृत्वं कुतः मयाःगु जक मखुकि राजनीतिक नेतृत्व हे थ्व ल्वचं ग्रस्त जुल धइगु आम जनताया आरोप दु । राजनीतिक अस्थीरता, राजनीतिक नेतृत्वया नालायकिपन, अदालतया नेतृत्व हे भ्रष्टाचारय् लिप्त जुइगु व भ्रष्टाचारयात नियन्त्रण याये धकाः दयेकातःगु निकाय हे भ्रष्ट जुसेंलि उपचार याये थाकुइगु स्वभाविक हे जुल ।

हलिमय् यक्व देसय् भ्रष्टाचार जू । नेपाः जक अपवाद मखु । तर नेपाः थ्व इलय् वयाः भ्रष्टतय् स्वर्गया रुपय् न्ह्याःवंगु जक चिन्ताया विषय जुल । स्रोत खुले मजूगु ध्यबा नेपालय् दुत हयेगु मामिला निसें अदालतया प्रधानन्यायाधीश, न्यायाधीश, अख्तियारया प्रमुख आयुक्त, आयुक्तत हे भ्रष्टाचारय् कुख्यात जुयाच्वंगु घटनात सार्वजनिक जुयाच्वंगु दु ।

थुकथं भ्रष्टत सार्वजनिक जूगु नेपाःया राजनीतिक दल, सरकार, विपक्षीया दबाब, भ्रष्टाचार विरुद्ध ज्या याइगु निकायया सकृयतां जूगु मखु । भ्रष्टाचार नियन्त्रण यायेत पलाः ल्ह्वंगुलिं नं थुकथंया घटना सार्वजनिक जूगु मखु । थ्व ला भ्रष्टाचारया कारणं प्रतिनिधिमूलक घटनात कथुइ कथुइ तक थ्यनेवं सह याये मजियाः पिने वःगु घटना जक खः ।

सरकारया पक्षय् दुई तिहाइ दुगु इलय् भ्रष्टाचारया विरुद्ध सशक्त कारवाही याये फत धाःसा देसय् यक्व सुधार यायेत अःपुइ, मखु धइगु खःसा प्रधानमन्त्रीया समृद्धि नं न्हापा न्हापाया सरकारया खँ थें हे अथेंं तनावनी ।

थुकियात सार्वजनिक यायेगु मामिलाय् नेपाःया संचार माध्यमं तःधंगु ज्या यात । तर सरकारया नेतृत्व याइपिं, भ्रष्टाचारया विरुद्ध ज्या यायेमाःपिसं भाषणय् भ्रष्टाचारयात सह हे मयायेगु धाःसां व्यवहारय् भ्रष्टाचार नियन्त्रण यायेगु व भ्रष्टतय्त कारवाही यायेगु मामिलाय् यक्व हे लिउने खनेदु ।

ततःधंपिंसं भ्रष्टाचार याःगु प्रमाण सहित सार्वजनिक रुपं खँ पिने वःसां उमित भ्रष्टाचार विरुद्ध कारवाही स्वयां मात्र पदमुक्त यानाः फासांफुसुं यानाछ्वयेगु प्रवृत्तिया कारणं नं थन भ्रष्टाचार यायेत सुं हे मग्याःगु खः ।नेपाःया सरकारी निकाय मालपोत, यातायात, श्रम, स्थानीय निकाय, प्रहरी, राजस्व कार्यालयय् अप्वः भ्रष्टाचार जुइगु जनताया अनुभूति खः ।

थन च्वंपिं कर्मचारीतय्त भ्रष्टाचारय् कारवाही यात धाःसा मालपोत, यातायात थेंज्याःगु कार्यालयया अधिकांश कर्मचारीत कारवाहीलय् लानाः जनतायात बिइमाःगु सेवा हे बिइ मफइगु अवस्था दु धकाः स्वय्म अख्तियारं स्वीकार याःगु खनेदु । थुकिंं नं क्यं नेपालय् भ्रष्टाचार गुकथं व्यापक जुयावनाच्वन ।

भ्रष्टाचारयात थुकथं त्वःतातयेगु खःसा प्रधानमन्त्री छम्ह स्वच्छम्ह भ्रष्टाचार मयाइम्ह जुयाया अर्थ मदु । नेपालय् जुयाच्वंगु नं थ्व हे खः ।
गुलि भ्रष्टाचार म्हो याये फत जनताय् सुशासनया अनुभूति नं उलि हे अप्वइ ।

तर टनका टन लुँ एयरपोर्टं तस्करी जुइगु घटना, प्रधानन्यायाधीश, न्यायाधीशत हे भ्रष्टाचारय् संलग्न जूगु घटना धुंकाः भ्रष्टाचार नियन्त्रण याये धकाः उच्च पदय् च्वंपिं अख्तियारया हाकिमत हे करोडौं भ्रष्टाचार याइपिं धकाः खँ पिने वयेधुंकाः आशा यायेगु सु पाखें ? बरु तुलनात्मक रुपं राजनीतिक नेतृत्व भ्रष्टाचारय् संलग्न जूगु घटना पिने सार्वजनिक जक मजूगु खःकि राजनीतिक नेतृत्व भ्रष्टाचारय् म्हो जक संलग्न खः धइगु खँ आः हे निक्र्यौल यानाः धाये थाकुनि ।

तर उपराष्ट्रपतिया काय, मन्त्रीया परिवारया दुजःत पदीय दुरुपयोग यानाः ध्यबा कमे याः जुल धइगु आरोप नं उतिकं हे बय्बय् जुयाच्वंगु दु । तर मुख्य रुपं भ्रष्टाचारया विरुद्ध न्व जक वानां मगाः, खनेदइगु कथंया एक्सन काःसा जक प्रधानमन्त्रीं भ्रष्टाचार विरुद्ध न्ववाःगु खँ पत्या याये फइ । थ्व सरकारया पक्षय् दुई तिहाइ दु धइगुया फाइदा भ्रष्टाचारया विरुद्ध सशक्त पलाः ल्ह्वनाः क्यनेगु अवसर नं खः ।

तर सरकार गठनया दच्छियात स्वयेगु खःसा भ्रष्टाचार विरुद्ध सरकारया नेतृत्व सशक्त ढंगं पेश जूगु अनुभूति यायेथाय् मदु । खः प्रधानमन्त्री भ्रष्टाचारया मामिलां ताःपाः धइगु अनुभूति ला दु तर थ्व हे जक नं सम्पूर्ण मखु । अख्तियार व छुं छुं सरकारी निकायं भ्रष्टाचार, तस्करी व अनियमितताया विरुद्ध यानाच्वंगु पलाः रुटिन ज्या जक जुल । थुलिया लिधंसाय् जक भ्रष्टाचार म्हो जुइगु अवस्था मदु ।

सरकारया पक्षय् दुई तिहाइ दुगु इलय् भ्रष्टाचारया विरुद्ध सशक्त कारवाही याये फत धाःसा देसय् यक्व सुधार यायेत अःपुइ, मखु धइगु खःसा प्रधानमन्त्रीया समृद्धि नं न्हापा न्हापाया सरकारया खँ थें हे अथेंं तनावनी । राजनीतिक नेतृत्वया इच्छाशक्ति नं दुबल, अले ई व जनमतं नं साथ बिउगु इलय् हे परिवर्तनया अनुभूति जुइगु कथंया अपेक्षा जनताया खः ।

दच्छि ला उखेंथुखें मिले यायेत हे वन धाये, तर मेगु दछि तक नं थुकथं हे सरकार न्ह्यात धाःसा दुईतिहाइ हयाया छुं अर्थ दइमखु । जुजु वांछ्वयाः गणतन्त्र हल, संघीयता वलं नं व हे मुलु व हे सुका जुल धाःसा थ्व देसय् छुं जुइगु आशा यायेगु थाय् हे दइमखु ।

दकलय् न्हापां अनियमितता याःपिं गोपाल पराजुली, लोकमान कार्की थेंजाःपिंत पदय् मदयेवं अथें उन्मुक्ति बियाः कारवाही मयात धाःसा न्ह्याक्व भ्रष्टाचार यानाः कमे यानाः बदनाम जूसां आखिरय् मदइगु धइगु व हे छगू पद ला खःनि धइगु जुइ । अले न्ह्याक्व याःसां हाःसां, कडा कानून दयेकूसां भ्रष्टाचार म्हो जुइ मखु ।

सम्बन्धित बुखँ

LEAVE YOUR COMMENTS