श्रद्धाया छफ्वः स्वां जिमि गुरुयात

चैत्र ४ गते आइतवार सुथसिया ६ः३० बजे मोबाइलया घण्टी न्यात । भैरहवाया आँखा अस्पतालय् ज्या याइम्ह जिमि भिन्चा डा. कविन्द्रया फोन जुयाच्वन । सलय् भचा निराशपन दु, खबर छु दु सुथंनिसें फोन यात ? लिसः वल– तसकं दुःखया घटना जुल । बौद्ध जगतय् हे तःधंगु नोक्सान जुल । थौं चान्हय् भद्ररत्न सर मंत । ‘हांऽ, छु धयागु ? जितः ला १३ गते लिहां वये धयावंम्ह’,– जिं खइमखु नं धाये मफु । म्ह छम्हं क्वाःलखं लूम्ह थें जुल, छक्वलं छ्यं जिरिङ्ग जुल । फोनं धयाहल– शव छेँय् छ्वया हये धुन ११ बजे थ्यनी जुइ । म्याडम जिथाय् दु, प्लेनं छ्वयाहये । का लिपा फोन याये ।

जन्म–मृत्यु संसारया नियम खः, दक्व छन्हु वनेमानि, उकिं सुं नं सित धालकि छन्हु न्हापा छन्हु लिपा जक खः धकाः बिचाः यानाः छकः मिखा तिसिनाः श्रद्धा प्वंकाः क्वचायेका छ्वयेगु । तर थौं छाय् खः मसिउ मिखा तिसीसातं मिखां ख्वबि सलल बाःवल । दिके मफु । सुनापं न्वंमवाना । कलेज वना । पासापिंसं जिगु नां कयाः थौं छु जुल सरयात न्हापा थें मखु धकाः हालाच्वंगु जिं ताः । जिं छुं मधया । जित थौं ११ बजे जुइकेत आय्बुल । जि डा. चन्द्रमान सरयात ब्वनाः सानेपाय् च्वंगु भद्ररत्न सरया छेँय् वना । छेलिइ ग्वतुकातल । दुहां वना । ख्वाः खनेवं ख्वबि पने मफुत । अन सु दु जिं मखं, जिगु मिखा बुलुल । तुति भागि याना । पलख ल्हातं ख्वाः त्वपुयाः ख्वया । सरया काय्यात म्याडम ग्व धकाः न्यनाः क्वथाय् दुहां वना । म्याडमया ख्वाः खनेवं दुहां वनाः खँ ल्हायेगु जिके साहस मंत, दुहां हे मवँसे लिहां वया ।

अमेरिकाया क्रुजय् ज्या याइम्ह तःधिम्ह काय्यात स्वापू तयेमफुगुलिं उकुन्हु सिथं यंकीगु–मयंकीगु थेगान मजुल । उकिं जि लिहां वया । तर काय्म्ह नाप स्वापू मजूसां सन्ध्याया ५ बजे विधिकथं सिथं यंकाः मि तल । इमामन्दः काकां कुँ थहांवंगुपाखे स्वयाः शुन्यताय् थःत नं छुं ई तंकाच्वना । बुद्धया जन्मभूमिइ मंत, बुद्धया दर्शन नालाकाल, थःगु जिम्मेवारी गबलें ल्वःममंकू, तर १३ गते लिहां वयाः नापलाये धाःगु बचंयात पूमवंकूसे ४ गते हे थःगु दायित्वपाखें बिसिउँ वन । सर्गतय् थस्वयाः जीवन छु खः, गुकथं म्वायेमाः धइगु बिचारय् घण्टौं जि तन । गुलिसियां जीवन पहाड थें झ्यातुयाच्वनी, गुलिसियां जीवन कपाय् थें याउँसे च्वनाच्वनी । भद्ररत्न सर जिगु लागि कपाय् खः । जिगु लागि छम्ह अभिभावक, अझ जिगु जीवनया लँ तुतां खः । जिं वय्कःयात म्हसिउगु २० दँ ति दत । नेपालभाषा केन्द्रीय विभागय् बाह्य परीक्षक जुयाः तफिगु चश्मा तयाः झाइम्ह ।

वयां लिपा कीर्ति अध्ययन तथा अनुसन्धान मण्डलयात अनुसन्धान विधि स्यनादीम्ह गुरु । वयां लिपा बौद्ध अध्ययन ब्वंकादीम्ह गुरुकथं म्हसिल । जीवनयात माःगु ज्ञान बिउपिं लुमंपिं ल्वःमंपिं गुरुपिं ला यक्व दु । गुलिं दनि, गुलिं मंत । मदया वंपिं गुरुपिं ला गुलि लिपा तिनि सित धकाः सिइगु, ‘का सित ला’ धयाः क्वचायेकेगु ।जीव व जगतय् दुने गुलि रहस्य दु व सुनां धाये फइमखु । तर जिगु व भद्ररत्न सर दथुइया छगू रहस्य जिं थन ब्वयेत्यना । थौंसिबें झिदँ न्ह्यःया खँ, श्रावण महिना, गुन्हुपुन्हिया प्यन्हु न्ह्यः यलय् बुबहालय् च्वंम्ह पाजु मदुगु सुचं वल । जि वना । भचा लिपा हे सिथं यंकल । कन्हय्कुन्हु सुथय् बिचाः वना । बुबहालं पिहां वयेगु ध्वाखाय् भद्ररत्न सरयात नापलात । जिं धया– सर नमस्ते ।
– नमस्ते गन वनेगु ?
– म्हिगः पाजु मदुगु बिचाः फः वयागु । सर ले ?
– जि नं बिचाः फया वयागु । सु पाजु ?
– ज्ञानपाजु ।
– जि नं पाजुयाथाय् हे खः ।
जि भचा अजू चाल ।
– सर छु व हे गल्ली दुने हे खः ला ?
– खः ।
छम्ह हे पाजुया निम्ह भिन्चा दथुइ खँ जुल । वसिबें न्ह्यः जिपिं दाजु–किजा गबलें जुइ मफु । निम्हं दनाः तुं खँ ल्हाना । जितः तनाच्वंम्ह जिमि दाजु लुयावःगुलिं जि लय्ताः, बःचा धिकःबलय्निसें अबु मदुम्ह जि, छम्ह अभिभावक लुयावःथें जुल । गुरु व शिष्यया स्वापू, हिया स्वापुतिइ हिल । निम्हेसिया दथुया आत्मियताया चिखि तःगथः जुल । छुं खबर दत कि न्ह्यागु नं इलय् ‘बाबु छु यानाच्वना दक्वं म्हं फु ला ?’ धकाः न्यनीगु जुल । जितः नां काइगुसिबें बाबु धाइगु तसकं यः । व हे बाबुया पित्याः जि । उकिं जि सानेपाया छेँय् बरोबर वनेगु । गबलें फोन यानाः वनेगु, गबलें फोन मयासे हे वनेगु । छकः निकःला अजू चायेक नं वनेगु बहनी । लुखां दुहां वनेवं तयातःगु सोफाय् फ्यतुइगु । जि वनेवं दुने क्वथाय् च्वनाच्वनीम्ह जिमि भोतयात सःताः, ‘का बाउचा वःगु दु, च्या हिँ’ धाइ । तुति स्याःम्ह भोत उसि मचासे च्या ज्वनाः न्ह्यःने च्वं वइ । परिवारया खँ जुइ । जिगु न्ह्यःने बुरा जूसां भोतयात हायेका च्वनी । भोतं धाइ ‘बुरा जूसां हिसि मदु छिमि दाजु ।’ जि मन मनं वास्यावास्या न्हिलाः ‘बुराबुरी जुइकाः नं दक्वसियां थथे हे न्ह्यइपुकाः च्वने दःसा गुलि जिउ’ धयागु मती वइ । मन आनन्द जुइमाः, आयु नं ताःहाः जुइ धाइ, परिवारय् छतिं नं दुःख पीर मदु । दैवया लीला मनूतय् यःपिं द्यःया नं यः धाइ ।
गुरु शिष्यया नीदँया नाता, दाजु किजाया झिदँया नाता थौं चबूगु दु । दाजुकिजाया क्वातुगु गथःया चिखि थौं स्वब्याःगु दु । दाजुकिजा जुयाः नं ज्ञानया अंश काये मखंगुलिं जितः दुःखया महसुस जुयाच्वंगु दु । वहे अंशया दावी यायेत जिगु विद्यावारिधिया निर्देशकया रुपय् वय्कःयात ल्यया । छाय् खः मसिउ थौं जि खनाः हे तंचाःगु खः ला ? जि नापया स्वापूयात सदांया लागि चफुनाबिउगु दु ।
मनूत नं गुलि ब्यस्त, छन्हु धाधां निन्हु धाधां ई न्ह्यानाच्वंगु हे मचाः । भद्ररत्न सरं जिमि मांयात इहिपा धुकाःनिसें हे नाप मलाःनिगु जुयाच्वन । मां मफु धयागु इलय् चमाया ख्वाः मखंगु नं यक्व हे दत । जि टियु वयेबलय् थहां वये धाःगु हे नं न्हय्दँ दत । उगु हे दँय् मां मंत । अविभावकया रुपय् दाजु लुयावल । दाजुया अनुभूति ला उलि जिं काये मखन । तर नीदँ न्ह्यःनिसें लिपातक नं दाजु मखु, गुरुया रुपय् भद्ररत्न सर हे जुल । जिं गबलें छसः हे दाइ मधया । दुनुगलंनिसें सम्बोधन यायेमास्ति वःगु दाजुया अभिलाषा यप्पा दिपय् छ्वयाच्वंगु मिइ हे खरानी जुयावन । सदांया लागि तनावन । उकिं जिं थौं थः दाजुयात मखु, जिमि यःम्ह गुरुयात श्रद्धाया स्वां दुनुगलंनिसें अर्पण याना । अनिच्चावत संखारा ।।

सम्बन्धित बुखँ

LEAVE YOUR COMMENTS