ने. सं. ११४६ दिल्लागा तृतीया -

‘धः व आकाशं वइगु लः व्यवस्थापन यायेमाः’

येँ (नेपालभाषा टाइम्स) – येँ महानगरपालिकाया कार्यवाहक मेयर सुनिता डंगोलं फिब्वख्यः क्षेत्रय् बर्खाया इलय् दोहोरे जुयाच्वंगु डुबानया समस्या दीर्घकालीन समाधानया निंतिं धः व आकाशं वइगु लःया निकाया निंतिं बिस्कं बिस्कं पाइप प्रणाली दयेकेगु खँ धयादीगु दु । वय्कलं आपालं धयाथें थासय् धः व वाः वइगु लः छगू हे प्रणाली बाः वनीगु जुयाः सामान्य स्वयां अप्वः वा वयेवं निकास प्रणालीइ फये मफइगु अवस्था ब्वलंगु खँ नं धयादीगु दु ।

अज्याःगु समस्या चीकेत तत्कालीन व दीर्घकालीन समस्या ज्यंकेगु निंतिं येँ मनपा कुतः यानाच्वनागु खँ धयादिसें वय्कलं अज्याःगु थासय् गुरुयोजना दयेकाः ज्या यायेमाःगु खँ नं धयादीगु दु । वय्कलं दीर्घकालीन समाधानया निंतिं धः व बर्खाया लःया व्यवस्थापनयात बिस्कं बिस्कं प्रणालीइ रुपान्तरण यायेमाःगु धासें सरोकारवाला निकाय दथुइ समन्वय यानाः अज्याःगु पूर्वाधार विकासया निंतिं लगानी अप्वयेकेमाःगु खँ नं धयादीगु दु ।

सहरीकरणया तीव्र विस्तार लिसे पुलांगु धः प्रणालीइ आःया आवश्यकता फये मफयाच्वंगु धासें वय्कलं दीर्घकालीन सोचं लिसे आधुनिक वा फइगु प्रणाली (स्टर्म वाटर ड्रेनेज) विकास यायेमाःगु खँ नं धयादीगु दु । थीथी थासय् जग्गा अतिक्रमणया कारणं थज्याःगु समस्या वयाच्वंगु खँ नं वय्कलं धयादीगु दु ।

येँ मनपां फिब्वख्यलय् लः मुनिगु समस्या ज्यंकेगु निंतिं ज्या न्ह्याकेधुंकूगु दु । महानगरया प्रहरी बलं टुकुचा खुसीया थीथी थासय् सरसफाइ यानाच्वंगु दु ।