अख्तरविरुद्ध झिगू करोड जरिवानाया दावी

एजेन्सी- पाकिस्तानया छगू टेलिभिजन च्यानलं पुलांम्ह बलर शोएब अख्तरयात झिगू करोड (स्थानीय ध्यबा) जरिवाना पुलेत नोटिस बिउगु दु । अख्तरं थःपिंलिसे यानातःगु सम्झौता उल्लंघन याःगु धासें पाकिस्तान टेलिभिजन (पिटिभीं) झिगू करोड जरिवाना व स्वलाया तलब लित बीत नोटिस बिउगु खः ।

अख्तरं अन एयर जुयाच्वंगु कार्यक्रम पाखें हे थःगु राजीनामाया घोषणा यानाबिउगु खः । पिटिबीं अख्तरया थ्व घोषणां थःपिंत आर्थिक रुपं नोक्सान जूगु धासें जरिवाना दावी याःगु खः ।
पिटिभीलिसे अख्तरं यानातःगु सम्झौताय् निगुलिं पक्षं सम्झौता त्वाःथले फइ धयातःसां थुकिया निंतिं स्वला न्ह्यः हे जानकारी बीमाःगु व अथे मजुल धाःसा स्वलाया तलब बीमाःगु खँ न्ह्यथनातःगु दु ।

पिटिभीं अख्तरं थःपिं लिसे यानातःगु सम्झौता अःखः राजीनामा बिउगुलिं थःपिंत आर्थिक रुपं असाधारण क्षति जूगु खँ धाःगु दु । अख्तरं २६ अक्टोवरय् अन एयर जुयाच्वंगु कार्यक्रम पाखें हे पिटिभीं राजीनामा बियागु घोषणा याःगु खः । पिटिभीं टि २० विश्वकपया झ्वलय् अख्तर थःपिंत जानकारी हे मबिसे दुबई वंगु व अन वनाः भारतीय क्रिकेटर हरभजन सिंहलिसे छगू भारतीय टेलिभिजन कार्यक्रमय् वःगु धासें थ्व झ्वलय् अख्तरां पिटिभीया कार्यक्रम ‘गेम अन है’य् उपस्थिति मजुसे सम्झौताया उल्लंघन याःगु द्वपं बिउगु दु ।

अख्तरं पिटिभीपाखें वःगु कानुनी नोटिसं थः निराश जूगु धासें थःम्हं कानुनी लडाइ ल्वायेगु खँ धाःगु दु ।