पिएसजीयात बुकाः रियल क्वाटरफाइनलय्, सिटी नं अन्तिम च्यागुलिइ

एजेन्सी- रियल म्याड्रिड व म्यानचेस्टर सिटी च्याम्पियन्स लिगया क्वाटरफाइनलय् थासय् दयेकूगु दु । च्याम्पियन्स लिगया बुधवाः चान्हय् जूगु प्रि क्वाटरफाइनल कासाया निगूगु लेग कासाय् स्पेनिस क्लब रियल म्याड्रिडं फ्रेन्च क्लब पेरिस सेन्ट जर्मेनयात बुकाः क्वाटरफाइनलय् थाय् दयेकूगु खः । अथेहे च्याम्पियन्स लिगया मेगु कासाय् पोर्चुगिज स्पोर्टिङ सिपि लिसे बराबरीइ म्हितूगु म्याचेस्टर सिटीं समग्र कासा त्याकाः अन्तिम च्यागुलिइ थाय् दयेकूगु खः ।

सान्टियागो बर्नबाउइ जूगु प्रि–क्वाटरफाइनलया निगूगु लेग कासाय् करिम बेन्जेमाया ह्याट्रिकया ग्वाहालिं रियल म्याड्रिडं पिएसजीयात ३–१ गोलं बुकूगु खःसा समग्रय् ३–२ गोलं कासा त्याकाः क्वाटरफाइनलय् थाय् दयेकूगु खः । न्हापांगु लेगय् १–० गोलं त्याःगु पिएसजीं निगूगु लेगया कासाया न्हापांगु हाफय् फ्रेन्च कासामि केलियन एमबाप्पेया गोलं अग्रता काःगु खः, तर निगूगु हाफय् फ्रान्सया हे कासामि करिम बेन्जेमां १७ मिनेटया दुने ह्याट्रिक यायेवं पिएसजी धेंधेंबल्लाखं हे पिने लाःवंगु खः ।

बुधवाः चान्हय् जूगु मेगु कासाय् म्याचेस्टर सिटीं स्पोर्टिङ सिपी लिसे घरेलु मैदान गोलरहित बराबरी म्हितूगु खःसा समग्र ५–० गोलं कासा त्याकाः क्वाटरफाइनलय् थ्यंगु खः । न्हापांगु लेग कासा सिटी ५–० गोलं त्याकूगु खः ।

आक्रोशित पिएसजीया अध्यक्षं रेफ्रीया सामान तोडफोड
अन्तिम १६ य् आउट जुइवं पिएसजीया अध्यक्ष नासेर अल खेलाइफं रेफ्रीया सामान तोडफोड याःगु दु । कासाय् रेफ्रीया निर्णयं असन्तुष्ट जूम्ह पिएसजीया अध्यक्ष नासेर कासा क्वचायेधुकाः रेफ्रीया डे«सिङ रुमय् दुहां वनेत स्वःगु खःसा रेफ्रीं क्वथां पिहा वनेत इनाप यायेवं तोडफोड याःगु खः । कासाय् रियलं याःगु बराबरी गोलयात कयाः नासेर असन्तुष्ट जूगु खः ।

रियलया कर्मचारीतय्सं तोडफोडया भिडियो नं काःगु खःसा आः नासेरयात कारवाही यायेत भिडियो युइएफएय् छ्वइगु जूगु दु ।