बुंडेसलिगा मे १५ निसें न्ह्याइगु

बायर्न (एएफपी)– जर्मनीया बुंडेसलिगा व वया क्वय च्वंगु निगुगु डिभिजनमा फुटबल मे १५ निसें हाकनं न्ह्याइगु पक्का जूगु दु । चान्सलर एन्जेला मार्केल व प्रान्तीय नेतातय्सं अनुमती बिवं बुधवा: बहनि थुकियात कया: घोषणा जूगु ख: । कासा स्वकुमि मदूगु बन्द रंगशालाय् जुइ । अथेंतु कासामितय्त नियमित कोरोना भाइरस परिक्षण नं जुयाच्वनिगु जुइ । जर्मनी भाइरस संक्रमण पनेत लागू जुयाच्वंगु लकडाउन बुलुहुं चायेकूगु ज्या जुयाच्वंगु दु । घोषित ज्याझ्व: कथं जर्मनीइ फुटबल सुरु जुल धा:सा युरोपया प्रमुख फुटबल देय्तमध्ये लिग हाकनं न्ह्याइगु न्हापांगु जुइ । लिग आयोजकं कासा न्ह्याकेगु झ्वलय् जर्मन सरकारं घोषणा या:ना त:गु सकतां नियम पुवंक पालना यायेगु नं धा:गु दु ।