ने. सं. ११४४ कौलाथ्व षष्ठी -

छन्हुया दुने खुगू लाख मस्त धरतीइ

ईश्वी संवत्या न्हूदँ नं शुरु जुइधुंकूगु दु । सन् २०१८ शुरु जुयाः नं बछि फुइधुंकल । खय्तला थ्व विश्वय् थीथी देशय् थःथःगु हे कथंया संवत् प्रचलनय् दु । अथे खःसां ईश्वी संवत्यात अन्तर्राष्ट्रियं हे नाला कया वयाच्वंगु दु । उकिं थ्व ईश्वी संवत्या थीथी दिनय् विश्वय् छु गज्याःगु घटना जुल धइगु बारे आपालं जानकारी तयेगु याः । थ्व झ्वलय् थुगुसी सन् २०१८ जनवरी १ तारिख कुन्हु विश्वन्यंकं गुलि मस्तय्सं जन्म काल धइगु बारे छगू तथ्यांक पिहां वःगु दु । सन २०१८ या न्हापांगु न्हि अर्थात जनवरी १ तारिख कुन्हु विश्वन्यंकं स्वंगू लाख खुद्वः मस्त जन्म जूगु दु । युनिसेफया कथं उकुन्हु जन्म जूपिं मध्ये बछि मस्त ला गुगू देसय् जूगु खः ।

संयुक्त राष्ट्र संघया मस्तय् अधिकारया निंतिं ज्या याना वयाच्वंगु निकाय खः युनिसेफ । अले राष्ट्र संघया थ्व निकायं बिउगु तथ्यांककथं विश्वन्यंकं ईश्वी संवत्या न्हूदँ जनवरी १ कुन्हु जन्म जूपिं स्वंगू लाख खुद्वः मस्त मध्ये दक्षिण एसियाली राष्ट्र बंगलादेशय् जक ८,३७० मस्तय् जन्म जूगु अनुमान याःगु दु । थ्व धइगु उकुन्हु छन्हुया दुने विश्वन्यंकं जन्म जूपिं मस्त मध्ये २ दशमलव १७ प्रतिशत खः ।
थुकथं हे उकुन्हु छन्हुया दुने दक्षिण एसियाया भारतय् ६९ हजार ७०, एसियाली राष्ट्र चीनय् ४४, ७६०, अफ्रिकी राष्ट्र नाइजेरियाय् २०,२१० दक्षिण एशियाया मेगु देय् पाकिस्तानय् १४,९१०, इनडोनेसियाय् १३,३७०, संयुक्त राष्ट्र अमेरिकाय् ११,२८०, मध्य अफ्रिकी राष्ट्र कंगोय् ९,४००, इथियोपियाय् ९,०२० मस्तय् जन्म काःगु अनुमान युनिसेफया तथ्यांकय् दुथ्याकातःगु दु ।

थुपिं मध्ये गुलि मस्त जन्म जुइवं सित, गुलि स्वस्थ व अस्वस्थ जन्म जुल धइगु बारे धाःसा राष्ट्र संघीय निकाय युनिसेफं छुं स्पष्ट याःगु मदु । यद्यपि जन्म जूपिं मध्ये अप्वःथें मस्त स्वस्थ जूसां गुलिखे मस्त धाःसा जन्म जुइवं सीगु युनिसेफं न्ह्यथंगु दु ।
युनिसेफपाखें उकुन्हु जन्म जूपिं मस्तय् बारे जानकारी बीगु ल्याखं पित बिउगु विज्ञप्तीइ सन् २०१८ जनवरी १ कुन्हु दकलय् न्हापांम्ह मचा किरिबाटीया क्रिस्मस टापु, व दकलय् लिपांम्ह मचा अमेरिकाय् जन्मक काइगु अनुमान यानातःगु खः ।