एमबापे वनी कि च्वनी ?

हिमेश

आःया विश्व फुटबलय् थ्व छगू थज्याःगु न्ह्यसः खः, गुकिया लिसः आःतक सुयाकें मदु, सायद केयलिन एमबापेयाके नं मदुनि जुइ । न्ह्यसः खः, थुम्ह फ्रान्सेली कासामिं आः वइगु सिजन छु क्लबपाखें म्हिती जुइ ? पेरिस सेन्ट जर्मेन (पीएसजी) पाखें हे कि रियल म्याड्रिडपाखें ? अथे ला थ्व न्ह्यसः एमबापेयात नं न्यनेगु ज्या मजूगु मखु ? तर वया लिसः जुइ, ‘जिं थुकियाबारे छुं हे निर्णय यानाःगु मदु । आः थत्थें जिगु ध्यान फुटबल म्हितेगुलि जक दु ।’

थ्व ला गाक्कं कुटनीतिक लिसः हे जुल । दकलय् न्हापां थ्व न्ह्यसः पिदंगुया पृष्ठभूमि स्वये । एमबापे आःया विश्व फुटबलया दकलय् प्रतिभाशाली कासामिमध्ये छम्ह खः । यक्वसिनं धायेगु याः लियोनल मेसी व क्रिस्टियानो रोनाल्डो धुंकाः सुं छम्ह कासामि विश्व फुटबलय् दकलय् तःधंम्ह स्टार जुइ धाःसा व एमबापे हे जुइ । एमबापे छम्ह तसकं बांलाःम्ह कासामि खः धयागु ख“य् नं सुयां शंका मदु । अझ वं अज्याःगु यानाः क्यंगु दु, गुगु मेसी व रोनाल्डाें नं यायेमफु । अथे धयागु विश्वकप त्याकेगु । फ्रान्सया निंतिं वं रुसय् जूगु विश्वकप त्याकूगु खः ।

पीएसजीनाप वया अनुबन्ध थ्व सिजनया लिसें क्वचाये त्यंगु दु, तर वं आतक न्हूगु अनुबन्ध यायेगु छुं नं इच्छा क्यनाच्वंगु मदु । थगुने हे रियलं वयात न्यायेत तःधंगु इच्छा क्यंगु खः, अले थुकिया निंतिं कीर्तिमानी रकम पुलेत नं तयार जूगु खः, अथे धयाःगु २० करोड डलरसिबें अप्वः । तर पीएसजी तयार मजू । फ्रान्सया थ्व क्लबय् कतारी लगानी दु, अले उमिगु निंतिं ध्यबाः छुं तःधंगु खँ मखु ।

पीएसजीया नीति हे खः, थःलिसे अनुबन्ध जुयाच्वंम्ह कासामितयात न्ह्याक्व हे ध्यबाया प्रस्ताव वःसां मिया मछ्वयेगु । बरु मेगु पालय् व हे कासामि सितिकं गनं वंसा छुं मतलब मदु । पीएसजीया निंतिं थ्व नीति प्रतिष्ठानाप स्वानाच्वंगु ख“ खः । एमबापे मेपिं सुं कासामि थें ला पक्कां मखु, उकिं पीएसजीं वयात आः ह्ययेका च्वंगु दु, अले प्रस्ताव तयाच्वंगु दु, छवाःया तलब हे, १० लाख डलरसिबें अप्वः बीगु । उकिया अर्थ व विश्व फुटबलय् दकलय् अप्वः कमे याइम्ह कासामि जुइ ।

पीएसजीया दकलय् तःधंगु आज्जु धयागु हे युरोपेली च्याम्पियन्स लिग त्याकेगु खः । थुकिया निंतिं क्लबयात एमबापे थेंज्याःपिं कासामि ला पक्का मालीगु हे जुइ । हाकनं पीएसजीं वयात गुलि तक धाःगु दु धाःसा आः वइगु मेगु सिजनय् पूरा टिम हे वया कासाया जःखः च्वनीगु कथं दयेकीगु जुइ, व नं क्लबय् मेसी व नेयमार थेंज्याःपिं कासामि दुसां । छगू कथं पीएसजीं एमबापेया निंतिं तःधंगु जोखिम कायेत तकं तयार खने दयाच्वंगु दु ।

एमबापेया नं छगू तःधंगु आज्जु दु, अझ धाये म्हगस । व खः– रियलया नितिं म्हितेगु । वं आः जक मखु, न्हापांनिसें धयाः वयाच्वंगु खः, छन्हु रियलपाखें म्हितेमानी । रियलयात नं ला व थेंज्याःम्ह कासामि दुसा छु माल धकाः ? अझ आः ला व फ्रि–ट्रान्सफरय् वइगु जुइ, अथे धयागु वया निंतिं पीएसजीयात ध्यबा पुलाच्वने म्वाःल । रियलय् थौकन्हय् न्हापा थें तःधंपिं स्टार कासामित नं मदु, उकिं वयात एमबापे मालाच्वंगु दु ।

नकतिनि हे च्याम्पियन्स लिगया अन्तिम १६ या न्हापांगु लेगय् पीएसजीं रियलयात बुकल, व नं छगू गोलं । अले व गोल याःम्ह कासामि मेपिं सुं मखुसे एमबापे हे खः । गोल यायेवं थः समर्थकतपाखे ल्हाः ल्ह्वनाः लसता नं प्वंकूगु खः । थुकिया अर्थ सायद वया इच्छा पीएसजीइ तुं च्वनाच्वनेगु हे खः कि ? उबलय् वं धाःगु नं खः, ‘आः थत्थें जिं छुं निर्णय मयानी ।’ आः सकसियां इच्छा खः, वया खास नुगःया ख“ न्यनेगु ।

सम्बन्धित बुखँ

LEAVE YOUR COMMENTS