लगमय् मि च्यानाः छम्ह सित, निखा छेँ च्यात

येँ– थौं सुथय् लगमय् च्याःगु मिइ लानाः छम्ह सीगु दुसा छम्ह घाःपाः जूगु दु । सुथय् ४ बजे पाखे मि च्याःगु मिइ लानाः निखा छेँ नं झौ जूगु दु ।
मिइ लानाः काभ्रेपलाञ्चोक छेँ जुयाः लगमय् च्वनाच्वंम्ह ६५ दँया जीवनकाजी श्रेष्ठ सीगु खः । वय्कःया ४२ दँया प्रवीणलाल श्रेष्ठ घाःपाः जूगु खँ धाःगु दु ।

जीवनला लगंया अमृतलाल रंजितया छेँ छखां बालं कयाः च्वनाच्वंपिं खः । मिं लानाः नापसं च्वंगु अष्टनारायण महर्जनया छेँ नं बांमलाक च्याःगु खँ धाःगु दु ।
मिइ लानाः छेँय् तयातःगु ग्यास सिलिन्डर नं मुयावःगु खः । सुथय् ४ बजे पाखे च्याःगु मि स्वघौतकया कुतः लिपा जक स्यायेफुगु खः । येँय्, यल, ख्वपया दमकल लिसें स्थानीयवासी, प्रहरी, सेनाया कुतलं मि स्याःगु खः ।

मिइ लानाः सीम्ह जीवनलाल श्रेष्ठ पारालाइसिस जुयाः छेँय् हे च्वनाच्वंम्ह खः । मि च्यायेवं अबुयात पिने हयेगु कुतः यानागु जूसां हयेमफुगु खँ घाःपाः जूम्ह प्रवीणलालं कंगु दु । प्रवीणयात उपचारया निंतिं वीर अस्पताल यंकूगु खँ धाःगु दु ।