सत्ता गठबन्धन लिपा स्वंगू देय् विशेष रुपं सक्रिय
येँ (नेपालभाषा टाइम्स)- प्रधान मन्त्री पुष्पकमल दाहालया नेतृत्वय् न्हूगु सरकार गठन जुइवं हे चीन, भारत व अमेरिकाया राजदूतत सक्रिय जुया वःगु दु । वय्कः प्रधानमन्त्री जुयाः शपथ ग्रहण यायेवं हे वय्कःयात भारतीय प्रधानमन्त्री नरेन्द्र मोदी व चिनियाँ प्रधानमन्त्री ली खछ्याङपाखें बधाई बियाहःगु दु । निगुलिं देय्या प्रधानमन्त्रीतय्सं थःथःपिनि राजदूत मार्फत प्रधानमन्त्री– यात दाहालयात भिंतुना बियाहःगु खः ।
थौंकन्हय् नेपाःया राजनीतिइ न्हापा न्हापा जूसा भारत याकःचा हे जक हालीमुहाली जुइगु खःसा थौंकन्हय् चीन व अमेरिका नं सीदयेक सक्रिय जुयाच्वंगु खनेदु । खास यानाः नेपालय् अमेरिकी गतिविधि अप्वया वयेवं चीन नं खने दयेक हे सक्रिय जुया वःगु खःसा थ्व निगू देय् सक्रिय जुया वयेवं भारतीय सक्रियता छुं भचा कम जुया वनाच्वंगु खने दयाच्वंगु खः । तर आः एमालेया समर्थनय् माओवादी अध्यक्ष दाहालया सरकार बने जुइवं भारत हानं सक्रिय जुइत स्वया हःगु अनुमान याना हःगु दु ।
दाहालं नेपाली कांग्रेसलिसे जानाः सरकार गठन यायेगु धकाः तयारी यानाच्वंगु खःसां अन्तिमय् वनाः एमाले व माओवादीया सरकार गठन जूगुलिं थुकिया लिउने चीनया ल्हाः दु लाकि धइगु ग्याःचिकु भारतयात जूवंगु खँ धाःगु दु । उकिं भारतीय प्रधानमन्त्री नरेन्द्र मोदीं थः दाहाललिसे जानाः अझ विस्तृत रुपं ज्या यायेत तयार दु धइगु संकेत बियाहःगु दु ।
थुकिया लिसें प्रम दाहालं नं थः प्रधानमन्त्री जुइसातकि न्हापांगु अन्तर्वार्ता छगू भारतीय सञ्चार माध्यमयात हे बियादीगु दुसा थुगुसी थःगु न्हापांगु विदेश भ्रमण भारतंनिसें शुरु जुइगु खँ नं धयादीगु दु । अथे खःसां भारतीय प्रधानमन्त्रीया बधाई सन्देशय् वय्कःयात भारत भ्रमणया ब्वनापौ धाःसा छ्वया हःगु मदुनि । दाहाल न्हापांखुसी प्रधानमन्त्री जूबलय् न्हापांगु विदेश भ्रमण चीनय् यानादीगु खः ।
वामपन्थी छधी जुइत्यंगु खः कि ?
देय्या राजनीतिइ आकाझाकां धइथें हिउपाः वयाः वामपन्थीतय्गु सरकार गठन जूगुलिं अन्तर्राष्ट्रिय ख्यलय् न्हू कथंया तरंग वःगु अनुमान याना हःगु दु । एमालेया समर्थनय् माओवादीं सरकार गठन याःगुलिं थुकियात वामपन्थीत छधी जुइत स्वःगु खः लाकि धकाः अनुमान जुयाच्वंगु दु ।
उकिसनं आः एमालेपाखें कुचा जुयाः निर्माण जूगु माधव नेपाल नेतृत्वया नेकपा (एस) यात नं सरकारय् यंकेगु धकाः तयारी जुयाच्वंगुलिं वामपन्थीतय्त छुं विशेष शक्तिं छथाय् तयेत स्वःगु खः लाकि धकाः अन्तर्राष्ट्रिय ख्यलय् चर्चा जूगु खँ नं सूत्रं धाःगु दु । खास यानाः नेपाःया उत्तरी जःलाखःला देय् चीनं एमाले व माओवादीयात छथाय् तयेगु लागिं न्हापा नं कुतः यानाच्वंगु जूगुलिं आः नं थ्व विकासक्रमया लिउने चीनया ल्हाः दु लाकि धकाः भारत सशंकित जूगु खँ सूत्रं धाःगु दु ।
LEAVE YOUR COMMENTS