
येँ – चीनय् ब्वलंगु कोरोना भाइरस पनेगु लागिं नेपालं चीनया सीमाय् कडाई याः थें भारतं नेपाःया सीमाय् कडाई याना हःगु दु । नेपाः भारत स्वाइगु फुक्कं नाकाय् भारतं म्हीगंनिसें निगरानी अप्वयेकुसें सुयातं ज्वरो वयाच्वंगु दु वा सेखं चायाच्वंगु दुसा डाक्टर क्यनाः जक भारतपाखे दुहां वा धकाः प्रचार नं यानाच्वंगु दु ।
भारतं खास यानाः थःगु उत्तर प्रदेश, विहार, पश्चिम बंगाल व उत्तराखण्ड प्रान्तलिसे स्वाःगु नेपाःया नाकाय् अज्याःगु निगरानी बढे याःगु खः । अन ज्वरो वःपिं सुं दुसा डाक्टर निं क्यनादिसँ धकाः माइकिङ समेत यानाच्वंगु दुसा जाँचया लागिं नापसं डाक्टरया व्यवस्था नं यानातःगु दु । पश्चिम बंगाल क्षेत्रय् धाःसा ज्वरो वःपिं सुं दुसा तुरुन्त यंकाः अस्पतालया आइसोलेशन वार्डय् हे तयाः वासः याकेगु यानाच्वंगु दु । भारतं नेपाःमित अप्वः वइगु बागडोगरा विमानस्थलय् नं परीक्षणया व्यवस्था याःगु दु ।
भारतपाखें कोरोनायात कयाः तसकं चिउताः तया हःगुलिं निगू नाकाय् नेपालं नं अस्थायी शिविर हे तयाः कोरोना जाँच याकेगु ज्या यानाच्वंगु दु । थ्वहे झ्वलय् चीनय् अध्ययन यानाच्वंपिं नेपाःमि विद्यार्थीतय्सं थःपिंत उद्धार याये माल धकाः माग यानाच्वंगु दुसां नेपाः सरकारं धाःसा उमित तत्काल उद्धार यायेगु तयारी मदुगु खँ धाःगु दु । चीनया वुहानय् १९० म्ह नेपाःमि विद्यार्थीतय्सं थःपिंत उद्धार यायेत चीनस्थित नेपाःया दूतावासयात इनाप याःगु खःसां विद्यार्थीया उद्धार यायेगु सवालय् सरकारं माःगु ज्या न्ह्याकेत तकं समस्या जुयाच्वंगु खँ धाःगु दु ।
स्वास्थ्य मन्त्रालयया प्रवक्ता महेन्द्र श्रेष्ठं चीनया वुहानय् दुपिं विद्यार्थीतय्त नेपाः हये न्ह्यः यायेमाःगु तयारीया विषयसं सलहल जुयाच्वंगु खँ धाःगु दु । प्रवक्ता श्रेष्ठया कथं चीनय् अध्ययन यानाच्वंपिं विद्यार्थीयात नेपालय् हयेधुंकाः उमित अस्पतालया आइसोलेसन वार्डय् तयाः निगरानी यायेमाःगुलिं उकिया तयारी जुयाच्वंगु दु । श्रेष्ठया कथं कोरोना भाइरस न्यनावनिगु ई निन्हु निसें झिंप्यन्हु तक दइगु जूगुलिं उमित बिस्कं तयेगु बारे सहलह जुयाच्वंगु दु । अथे खःसां आः तक सुं नं नेपाःमि विद्यार्थीयात संक्रमण जूगु धाःसा मदुनि । कोरोना भाइरसया संक्रमण आः तक विश्वया झिंखुगू देशय् खने दयेधुंकूगु दु । थुगु भाइरसं चीनय् जक १७० म्हेसिया ज्यान वनेधुंकूगु दुसा ७७११ म्ह मनू विरामी जुयाच्वंगु दु ।
LEAVE YOUR COMMENTS