ने. सं. ११४३ तछलाथ्व दशमी -

ख्येँया भाः थहां वन, किसानत अझं मर्काय्

येँ – ख्येँया भाः थहां वंसां अझ नं लागत मू उठे मजूगु खँ किसानतय्सं धाःगु दु । न्हापा निसःतका क्रेटया तूगु तग्वःगु ख्येँ आः छगू क्रेटया २८०।– तका थ्यंगु दु, अथेहे ११५।– तका थ्यनाच्वंगु चिग्वःगु ख्येँया भाः २३०।– तका थ्यंगु दु । ख्येँ छगःया लागत हे झितका तूगु धासें किसानतय्सं क्रेटया २८०।– तका थ्यंसां लागत धाःसा अझं उठे मजूगु खँ धाःगु दु ।

छगःया झितकाया ल्याखं किसानतय् भाः हे क्रेटया ३००।– तका तू वः ।थौंकन्हय् नेपालय् न्हि ४० लाख गः ख्येँ उत्पादन जुयाच्वंगु दु । छगू इलय् न्हि ५५ लाख उत्पादन जूगुलिं यानाः नं ख्येँया भाः कुहां वःगु खः । नेपाल अण्डा उत्पादक संघया केन्द्रीय नायः त्रिलोचन कँडेलं ५५ लाख गः तक उत्पादन जुयाच्वंगु ख्येँ आः बुलुहुँ उत्पादन म्हो जुयावःगुलिं भाः नं थहां वंगु खँ धाःगु दु ।

ख्येँया भाः कुहां वनाच्वंगुलिं यक्वसिनं माउ खा हे मिया छ्वःगु खँ वय्कलं धयादीगु दु । थुकिया लिसें तसकं गर्मी अप्वःगुलिं नं उत्पादन म्हो जूगु खँ धाःगु दु । आः माग स्वयां उत्पादन म्हो जुयावं लिसे ख्येँया भाः हाकनं थहां वनीगु खँ संघया केन्द्रीय सचिव मदन पोखरेलं धयादीगु दु । स्वदँ न्ह्यव ख्येँ क्रेटया ३६० तका तक थ्यंगु खः ।

तर थुगुसी धाःसा लागत हे उठे मजुइक ख्येँ भाः कुहां वःगु किसानतय्सं धाःगु दु । नेपालय् न्हय्द्वः किसानतय्सं खा लहीगु ज्या याना वयाच्वंगु तथ्यांक दु । थुकी छगू लाख ५० हजार स्वयां अप्वःसित रोजगार चूलानाच्वंगु खँ नं संघया अध्यक्ष पोखरेलं धयादीगु दु । तर दानाया भाः थहां वनीगु लिसें बैंकया ब्याज नं अप्वया वनाच्वनीगु, तर ख्येँया भाः धाःसा कुहां वनीगु जुया च्वंगुलिं बुलुहुं किसानत थ्व पेशापाखें हे विस्थापित जुया वनाच्वंगु खँ नं वय्कलं धयादीगु दु ।