नेवाः देय् दबूया विधान अधिवेशन

येँय् नं न्यासः किलोमिटर तापाक्क नेपालगञ्जय् नेवाःतय्गु मंकाः नापं राष्ट्रिय संगठन नेवाः देय् दबूया विधान अधिवेशन जुल । दबूया इतिहासय् न्हापांखुसि थ्व विधान अधिवेशन जूगु धाःसा पक्कां हे मखु । थ्व स्वक्वःगु विधान अधिवेशन खः । तर थुगुसीया विधान अधिवेशन ऐतिहासिक जूगु दु । विधान संशोधनया ल्याखं स्वल धाःसा आः तकया दकलय् महत्वपूर्णगु ज्या जूगु दु । थ्व ल्याखं नं नेपालगञ्जया विधान अधिवेशन ऐतिहासिक जूगु दु ।

देय् संघीय संरचनाय् वने धुंकाः नेवाः देय् दबूयात नं संघीय संरचनाय् यंकेगु ज्या जूगु दु । अले देय् दबूयात अझ अप्वः क्वातुका यंकेगु नापं नेवाःतय्गु भावना कथं ज्या याना वनेगु निंतिं लँ चायेकेगु ज्या जूगु दु । देशय् न्हय्गू प्रदेश दुगु अवस्थाय् नेवाःतय्गु बसोबासनिसें नेवाःतय्गु विशेष अवस्थायात ध्यानय् तयाः थुगुसीया विधान अधिवेशनपाखें आः स्वनिगःयात ब्यागलं कथंया प्रदेशया रुपय् नालाः च्यागू प्रदेश दयेकूगु दु । येँ, यल, ख्वपयात दुथ्याकाः स्वनिगः प्रदेश दयेकूगु दु । अले तहगत ल्याखं केन्द्र, प्रदेश, जिल्ला, पालिका व वडा समिति दयेकेगु व्यवस्था याःगु दु । देशं पिने च्वनाः संगठित जुयाच्वंपिं नेवाःतय्गु संगठनयात सम्बन्धन सदस्य धकाः मान्यता बिइगु जूगु दु । नेवाः भाषा, लिपि, कला, संस्कार, संंस्कृति संरक्षण व प्रवद्र्धन नापं नेवाः समुदायया विकास व उत्थानया निंतिं देशं पिने क्रियाशिल जुयाच्वंगु खलः पुचःयात केन्द्रपाखें सम्वन्धन बिइगु धाःगु दु । थुकिया अर्थ आवंलि विदेशय् दुगु खलः पुचःयात नं नेवाः देय् दबूया हे कुसां कुइकाः सकल नेवाःतय्त छगू हे थासय् तया यंकेगु धाःगु खः ।

सदस्याताया ल्याखं थुगुसीनिसें विधानय् आजिवन सदस्य व नेवाः ट्रष्टि सदस्य थप याःगु दु । नेवाः भाषा, कला, संस्कृति, व्यापार, व्यवसाय नापं राजनीतिक, सामाजिक आदि ख्यलय् विशेष योगदान याःपिं व्यक्तित्वपिंत आजिवन सदस्य दयेकेगु व्यवस्था याःगु दु । अथेहे क्वःछिनातःगु ध्यबा कयाः केन्द्रपाखें महाधिवेशन व प्रदेशया अधिवेशनय् ब्वति काये दइगु तर उम्मेदवार जुइ मदइगु कथंया व्यवस्था यानाः ट्रष्टि सदस्यया व्यवस्था याःगु दु ।

नेवाः देय् दबुलिइ आवद्ध नेवाः जातीय संगठनया केन्द्रीय समितिपाखें छम्ह÷छम्ह महाधिवेशन प्रतिनिधि जुइगु व्यवस्था याःगु दु । अथे हे फुक्क जिल्लापाखें म्होतिं ं छम्ह लाइगु कथं प्रदेश अधिवेशनं निर्वाचित म्होति नं २० म्ह वा प्रदेश अधिवेशनय् प्रतिनिधि याःपिनिगु संख्याया आधारय् झिम्हेसिया छम्ह प्रतिनिधि जुइगु व्यवस्था याःगु दु । अथे हे केन्द्रीय विषयगत समितिपाखें स्वम्ह, नेवाः समाजय् योगदान याःपिं विविध विधा व क्षेत्रया नेवाःत मध्ये कुल महाधिवेशन प्रतिनिधिया ५ प्रतिशत अध्यक्षपाखें मनोनित यायेगु व्यवस्था याःगु दु ।

केन्द्रीय नेतृत्वया सवालय् प्रत्येक प्रदेशपाखें छम्ह छम्ह उपाध्यक्ष अर्थात न्वकूया व्यवस्था याःगु दुसा थप छम्ह वरिष्ठ न्वकू नापं यानाः गुम्ह उपाध्यक्षया व्यवस्था याःगु दु । अले मिसापिनिगु समानुपातिक रुपं प्रतिनिधित्व याकेगु कथंया संशोधन याःगु दु । थुगु ल्याखं स्वल धाःसा नेवाः देय् दबूयात अझ क्वातुका यंकेगु निंतिं बांलाःगु पलाः थुगुसीया विधान अधिवेशनय् जूगु दु । विधान अधिवेशनय् नेवाः देय् दबूपाखें विधान संशोधनया निंतिं दयेकूगु समितिपाखें याःगु प्रस्तावयात पारित याःगु खः ।

विधान अधिवेशनय् फ्लोरपाखें अर्थात अधिवेशनय् प्रतिनित्व यानादीपिनिगुपाखें न्हूगु कथंया प्रस्ताव नं वन । थ्व झ्वलय् जि थम्हं आवंलि नेवाः देय् दबूयात नेवाःतय्गु मंकाःगु व राष्ट्रिय संगठनयात न्ह्यःने यंकेगु खःसा दबूया केन्द्रंनिसें पालिका समितिइ तकं नेतृत्वय् च्वनीपिंसं थःगु कार्यकालय् दलया ध्वाँय् ज्वनाः, दलया नेता कार्यकर्ता धकाः सार्वजनिक रुपं ज्याझ्वलय् ब्वति कायेगुनिसें अज्याःगु कथंया गतिविधि मयायेगु खँ विधानय् हे दुथ्याकेमाः धकाः प्रस्ताव तया । उगु कथंया प्रस्ताव तयेवं विधान अधिवेशनय् ब्वति कयादीपिनिगु दथुइ छगू कथंया तरंग वल ।

छम्हेस्यां मेम्हेसिया ख्वाः स्वयेगु, उकियात हे कयाः टिक्का टिप्पणी यायेगु नापं उगु कथंया प्रस्तावयात कयाः थःथःगु मत तयेगु ज्या जुल । विधान अधिवेशनय् ब्यापक कथं थःथःगु नुगःखँ तयेगु ज्या नापनापं छकः दिपाः हे कयाः न्हूगु वःगु प्रस्तावय् थप सहलह ब्याकेगु कुतः जुल । अनौपचारिक रुपं सहलह जुल । आवंलि नेवाः देय् दबूया नेतृत्वय् च्वनीपिंसं थःगु कार्यकालय् दलया ध्वाँय् ज्वने दइमखु धयागु खं यानाः राजनीतिक दलय् अप्वः क्रियाशिल जुयाच्वंपिंत तसकं ज्यामछिन । उगु हे इलय् थुगु प्रस्तावया बारे माल धाःसा ल्हाःचिं तकं मुंकेगु धकाः सहलह ब्याका ।

लिपा वनाः म्होतिं नं केन्द्रीय अध्यक्ष व महासचिवया निंतिं अज्याःगु व्यवस्था यायेमाः धकाः लविङ याना । अन्ततः मत विभाजन मयासे छगू हे मतं अथे धइगु सर्वसहमतिं पारित यायेगु कथंया सहलह जुल । अले नेवाः देय् दबूया विधान अधिवेशनया नायः नापं दबूया केन्द्रीय अध्यक्ष नरेश ताम्रकारं न्हूगु अभ्यास यायेगु अले थ्व प्रस्थान विन्दु कथं नालेगु धकाः दबूया केन्द्रीय अध्यक्ष छम्हेसिया निंतिं लागू यायेगु धकाः मञ्चं धयादिल । उकियात सर्वस्वीकार यायेगु ज्या जुल । सकलसिनं छगू हे मतं पारित यायेगु ज्या जुल ।

आवंलि नेवाः देय् दबूया केन्द्रीय अध्यक्ष थःगु कार्यकाल ज्वःछि पार्टीया ध्वाँय् ज्वनाः सार्वजनिक रुपं ज्याझ्वलय् सहभागी जुइ मदइगु, अले जि फलाना पार्टीयाम्ह नेता कार्यकर्ता खः धकाः सार्वजनिक रुपं धाये मदइगु कथंया व्यवस्था विधानय् हे जुइगु जुल । थ्व धयागु नेवाः देय् दबूयात दलियकरण याना यंके मफयेकेगु निंतिं छगू पलाः खः । थ्व हे भावना कथं आः प्रदेश समिति, जिल्ला समितिनिसें पालिका व वडा समितिइ नं ज्या न्ह्याइगु अवस्था ब्वलंगु दु । उलि जक मखु थौं केन्द्रीय नायः छम्हेसिया जक खँ जूगु खःसा आः मेमेपिनिगु हकय् नं थ्व लागू यानाः नेवाःतय्गु मंकाःगु व राष्ट्रिय संगठनया रुपय् नेवाः देय् दबूयात यंकेगु निंतिं लँपु चाःगु दु ।

नेवाः देय् दबूपाखें आवंलि स्वनिगः प्रदेशयात केन्द्रीत यानाः छगू कथंया ज्याझ्वः, स्वनिगलं पिनेया प्रदेशयात केन्द्रीत यानाः मेगु कथंया ज्याझ्वः व देशं पिने च्वंपिं नेवाःतय्त केन्द्रीत यानाः स्वंगूगु कथंया ज्याझ्वः न्ह्याका यंकेमाःगु खँय् विधान अधिवेशनय् सहभागी जुयादीपिनिगु दथुइ छगू हे मत खनेदत । थ्व तसकं बांलाःगु खँ खः । उकिं थुगुसीया विधान अधिवेशनं नेवाः देय् दबूया नितिं अले नेवाःतय्गु नितिं छगू ऐतिहासिक ज्या जूगु दु धकाः धायेफइ ।

सम्बन्धित बुखँ

LEAVE YOUR COMMENTS