राजनीतिक नापं जातीय विभाजनया संकेत, महतोयात जनजातिया नं समर्थन

येँ -केपी ओलीया पुनर्गठित सरकारय् उपप्रधानमन्त्री जुयादीम्ह जसपा नेता राजेन्द्र महतों बियादीगु ‘बहुराष्ट्रिय राज्य’ सम्बन्धी अवधारणाया कारणं देशय् राजनीतिक जक मखु आः वयाः जातीय विभाजनया संकेत समेत खने दया वःगु दु ।

उपप्रधानमन्त्री महतों कुर्सीइ फ्यतुइसातकि मिडियायात प्रतिक्रिया बिसें बहुराष्ट्रिय राज्य निर्माणया थःपिनि एजेण्डायात न्ह्यःने न्ह्याकेगु जुइ धयादीगु खः । वय्कलं अथे धयादीसातकि थीथी पार्टी दुने नं खास यानाः एकल जातीय बिचाः दुपिं नेतातय्सं महतोया धापू विखण्डनकारी खः धकाः प्रतिक्रिया बियाहःगु दु । अझ उकिसनं एमाले त्वःतेत्यंपिं माधव नेपाल गुटं ला महतोयात सरकारं चीकेमाः धासें वय्कःया पुत्ला च्याकेगु ज्या समेत यानाहःगु दु ।

छखे थज्याःगु विरोध वयाच्वंगु इलय् मेखे पहिचानया लागिं संघर्ष यानाच्वंगु थीथी खलः पुचःतय्सं धाःसा महतोया धापूयात समर्थन यासें नेपाःया लागिं आवश्यक ‘बहुराष्ट्रिय राज्य’ हे खः धकाः प्रतिक्रिया बियाहःगु दु ।

जसपा दुने राजनीतिक लाइन कथं महतोलिसे मतभेद दुम्ह नेता राजेन्द्र श्रेष्ठं नं ‘बहुराष्ट्रिय राज्य’ सम्बन्धी धापूया खँय् धाःसा महतोयात साथ बियादीगु दु । नेपाः छगू बहुराष्ट्रिय देश हे जूगु कारणं नेपाःया सकल जाति, भाषा, संस्कृतिया पहिचान संरक्षित यायेगु खःसा बहुराष्ट्रिय राज्यया अवधारणा कथं हे न्ह्याः वनेमाःगु बिचाः तयादीगु दु । थ्व विषययात कयाः वय्कलं म्हिगः छगू भच्र्युयल अन्तक्र्रिया ज्याझ्वः समेत यानादीगु दु ।

अथे हे तामाङ घेदुङया नायः मोहन गोलें नं देशय् च्वंपिं सकल जातिया पहिचान सुरक्षित यायेगु खःसा ‘बहुराष्ट्रिय राज्य’या अवधारणा पाय्छि जू धइगु धापू सार्वजनिक यानादीगु दु । एमाले दुनेया ओली पक्षयापिं हे छुं जनजाति नेतातय्सं नं महतोया धापू नेपाःया सन्दर्भय् पाय्छि लाइन खः धकाः समर्थन याना हःगु दु ।
थुकथं महतोया धापूयात कयाः देशय् आकाझाकां जातीय कथंया विभाजन नं खने दया वःगु दु । प्रधानमन्त्री ओलीं संसद विघटन यायेवं उकिया विरुद्ध सतकय् कुहां वःपिं माधव नेपाल पक्षया नेतातय्सं महतोया ‘बहुराष्ट्रिय राज्य’ या अवधारणायात विरोध याःगुलिं उगु पुचः प्रति दुगु आदिवासी जनजाति व मधेसी समुदायया समर्थन व सहानुभूति आः पाः जुइगु खतरा दुगु खँ धाःगु दु ।

महतोया स्पष्टीकरण
थम्हं धयागु धापूयात एकल जातीय पक्षधरतय्सं विरोध यायेवं उपप्रधानमन्त्री राजेन्द्र महतों थःगु धापूयात कयाः स्पष्ट यानादीगु दु । वय्कलं थःगु धापू लित मकासे थथे धयागु हे कारणं थः विखण्डकारी, पृथकतावादी मजुयागु दावी यानादीगु दु । थःपिं सरकारय् च्वनाच्वंत्तले उगु एजेण्डयात न्ह्यःने यंकेगु थःपिनिगु नीति खः धासें वय्कलं थथे धायेगु ज्यायात विखण्डनकारी धाये मजिउगु तर्क नं तयादीगु दु ।