राजोपाध्याय समाजया पञ्चाभिषेक रूद्री क्वचाल

येँ (नेपालभाषा टाइम्स)- राजोपाध्याय समाजं लय्पतिकं न्ह्याका वयाच्वंगु पञ्चाभिषेक रूद्री वंगु मंगलवाः समापन याःगु दु । मखनय् महाद्यःयाथाय् तःजिगु धार्मिक अनुष्ठान पुजा यासें लय्पतिकं न्ह्याका वयाच्वंगु पञ्चाभिषेक रूद्रीया समापन याःगु खः ।

समाजं स्वनिगःया स्वंगुलिं सहरं स्वीन्याम्ह राजोपाध्यायपाखें थीथी पुजा पाठ यानाः पञ्चाभिषेक रूद्री पुजा समापन याःगु खः । १०८ कलश यात्रा यानाः न्ह्याःगु ज्याझ्वलय् ११ म्ह देव ब्राम्हणाखें लघु रुद्राभिषेक, गुम्हेसियापाखें नवचण्डी व शिव पञ्चा· पाठ याःगु खःसा झिद्वःया ल्याखय् अयुताहुति यज्ञ नं याःगु खः ।
समापन ज्याझ्वलय् संस्कृति, पर्यटन तथा नागरिक उड्डयन मन्त्री जीवनराम श्रेष्ठ पुजा यानादीगु खः। लिसें मन्त्री श्रेष्ठं उगु इलय् ओमधरानन्द राजोपाध्यायं संकलन यानादीगु ‘रूद्राभिषेकपद्धति’ नांया सफू नं पितब्वज्या यानादीगु खः ।

समाजं विश्वय् महामारी न्यनाच्वंगु कोरोनापाखें मुक्तिया कामना यासें दछि न्ह्यःनिसें ‘पञ्चाभिषेक रूद्री’ पुजा पाठ ज्याझ्वः शुरु याःगु खः । थगुने साउन १८ गते निसें शुरु जूगु ज्याझ्वः स्वनिगःया स्वंगुलिं सहरया शिवालयय् छन्हुं छगू हे इलय् न्याम्ह न्याम्ह देव ब्राम्हणपाखें रुदी पाठ याना वयाच्वंगु खः ।

थुगु पुजा अन्तर्गत येँया मखनय् च्वंगु महिन्द्रैश्वर महाद्यः, यल मंगलबजारय् च्वंगु विश्वेश्वर महाद्यः व ख्वपया तःमधिइ च्वंगु तिलेश्वर महाद्यःयाथाय् लय्पतिकं रुद्री पाठ याना वयाच्वंगु खः ।

सम्बन्धित बुखँ

LEAVE YOUR COMMENTS