च्यागू सञ्जाल सरकारया सम्पर्कय्
सामाजिक सञ्जालय् प्रतिबन्धय् मानवअधिकारया चिउताः
येँ (नेपालभाषा टाइम्स)/ राष्ट्रिय मानव अधिकार आयोगं सरकारं सामाजिक सञ्जाल बन्द यायेगु धकाः याःगु निर्णय पुनर्विचार यायेत इनाप याःगु दु । आयोगं म्हिगः जारी याःगु विज्ञप्तिइ सामाजिक सञ्जाल बन्द यायेगु निर्णयं लोकतान्त्रिक शासन व्यवस्थाया मर्म, संविधानं प्रत्याभूत यानातःगु मौलिक अधिकार व अन्तर्राष्ट्रिय कानुनी दायित्वय् प्रतिकूल लिच्वः लाइगु ख्याच्वः नं बियातःगु दु ।
आयोगं जारी याःगु विज्ञप्तिइ सामाजिक सञ्जालत ताः इलंनिसें सञ्चार व जनजीवन अभिन्न अंग जुयाच्वंगुलिं नियमन व व्यवस्थापनया निंतिं वैकल्पिक उपाय नालेत नं इनाप यानातःगु दु ।
आयोगं जारी याःगु विज्ञप्तिइ धयातःगु दु, ‘नियमन व व्यवस्थित यायेगु नामय् ताः इलंनिसें सञ्चालनय् दुगु सामाजिक सञ्जाल बन्द यायेगु निर्णयं आम उपभोक्ताय् प्रत्यक्ष लिच्वः लाइगु जक मखुसें संविधानया धारा १७, १९ व २७ य् दुगु अभिव्यक्ति स्वतन्त्रता, सञ्चारया हक व सूचनाया हक तकं संकुचन हइगु खनेदु ।’
थज्याःगु पलाखं मानव अधिकारया विश्वव्यापी घोषणा पत्र, १९४८ व नागरिक तथा राजनीतिक अधिकार सम्बन्धी अन्तर्राष्ट्रिय प्रतिज्ञा पत्र, १९६६ य् न्ह्यथनातःगु अभिव्यक्ति स्वतन्त्रताया अधिकार लिसे तकं सरकारया निर्णय ज्वःमलाःगु खँ आयोगं स्पष्ट यानातःगु दु ।
थ्वहे झ्वलय् सामाजिक सञ्जालय् प्रतिबन्ध तयेवं थीथी सामाजिक सञ्जालया प्रतिनिधितय्सं सरकार लिसे स्वापू तयाः न्यनेकने यायेगु ज्या न्ह्याकूगु खँ धाःगु दु । सामाजिक सञ्जालयात प्रतिबन्ध तयेवं फेसबुकया माउ कम्पनी मेटां सरकार लिसे सम्पर्क याःगु दुसा म्हिगः ट्वीटर (एक्सं) नं सूचीकरणया निंतिं सरकारयात सम्पर्क तःगु दु ।
ट्वीटरया सिंगापुरस्थित कार्यालयं सूचीकरण बारे जानकारी माग यानाः इमेल छ्वयाहःगु खँ सञ्चार मन्त्रालयया प्रवक्ता गजेन्द्र ठाकुरं जानकारी बियादीगु दु । वय्कलं ट्वीटरया इमेल वयेवं उकियात कयाः जानकारी बीधुनागु खँ नं कनादीगु दु ।
सरकारं प्रतिबन्ध तःगु २६ गू मध्ये च्यागू सामाजिक सञ्जाल सम्पर्कय् वःगु जानकारी नं प्रवक्ता ठाकुरं बियादीगु दु । नेपाःयात केन्द्रित यानाः सञ्चालन जुयाच्वंगु हाम्रो पात्रो बिहीवाः हे दर्ता जूगु दु । उकथं हे सम्पर्कय् वःगु मेटा फेसबुक, म्यासेन्जर, इन्स्टाग्राम, ह्वाट्सएप व थ्रेड्स सञ्चालन यानाच्वंगु कम्पनी खः ।
उकथं हे म्हिगः चिनियाँ सामाजिक सञ्जाल कम्पनी वी च्याटं नं सरकारयात सम्पर्क यानाः सूचीकरणया प्रक्रियायात कयाः जानकारी फ्वंगु दु ।
थ्वहे झ्वलय् म्हिगः गोदावरीइ न्ह्याःगु एमालेया विधान महाधिवेशनय् ब्वति कायेत झाःम्ह सूचना तथा सञ्चार मन्त्री लिसें सरकारया प्रवक्ता पृथ्वी सुब्बा गुरुङया फोटो कायेधुंकाः पत्रकारतय्सं ‘फोटो ला कायेधुन, फेसबुक बन्द दु आः छुकी तयेगु’ धकाः व्यंग्य याःगु खः ।
LEAVE YOUR COMMENTS