ने. सं. ११४६ पाेहेलागा द्वादशी - घ्यः चाकु संल्हु / ख्वपय् सम्यक

विराटय् महेन्द्रगोपाल हे हानं नायः

ख्वप/नेपालभाषा साहित्यया ख्यलय् ज्वःमदुगु योगदान बिया वयाच्वंगु विराट नेपालभाषा साहित्य सम्मेलन गुथि (विराट गुथि)या नायः पदय् हाकनं महेन्द्रगोपाल कर्माचार्य निर्वाचित जुयादीगु दु । विराटया नकितिनि क्वचाःगु नीनिक्वःगु तःमुँज्या व ५५ क्वःगु दँमुँज्यां कर्माचार्ययात हे हाकनं नायःकथं ल्यःगु खः ।
विराटया न्हूगु ज्यासना पुचलय् कृष्णभक्त बोडे न्वकु, प्रदीपरत्न शाक्य छ्याञ्जे, रामगोपाल चौगुथि दांभरिं व सुलोचना सैंजूयात लिउ दांभरिंकथं ल्यःगु दुसा दुजलय् हिरण्यप्रताप सांगामि, इन्द्रकुमार साखः, न्हूछेँभक्त कवां, महेन्द्रराज शाक्य, योगी स्यस्यः व रत्नालक्ष्मी भैलयात सर्वसम्मतिं ल्यःगु खः ।
वंगु शनिवाः विराटया नायः कर्माचार्यया सभापतित्वय् जूगु तःमुँज्याय् नेपालभाषा एकेदेमिया भाइस चान्सलर डा. पुष्पराज राजकर्णिकार मूपाहांकथं झायादीगु खः ।
ज्याझ्वःया बन्द सत्रय् विराटया छ्याञ्जे प्रदीपरत्न शाक्यं वार्षिक प्रगति विवरण व दांभरिं रामगोपाल चौगुथिं ल्याःचाः विवरण न्ह्यब्वयादीगु खः ।
ज्याझ्वलय् नेपाल प्रज्ञा प्रतिष्ठानया प्राज्ञलिसें नेपाल साहित्य मन्दिर ख्वपया नायः अगिब बनेपाली, नेपालभाषा मंकाः खलः येँया नायः रमेशमान पिया, नेपालभाषा मंकाः खलः यलया नायः हिराकाजी महर्जन लगायतं नुगःखँ तयादीगु खः ।
वरिष्ठ कवि डा. योगेन्द्र प्रधान, नेवाः देय् दबू ख्वप जिल्लाया नायः नरेश नेवालं भिंतुना न्वचु तयादीगु खः । न्हूगु ज्यासना पुचः ल्ययेगु निंतिं वरिष्ठ कवि डा. योगेन्द्र प्रधान, वरिष्ठ अधिवक्ता दुर्गामोहन श्रेष्ठ दुथ्याःगु निर्वाचन कमिटी नीस्वंगु खः ।
ज्याझ्वलय् कृष्णभक्त बोडें लसकुस यानादीगुख :सा रत्नालक्ष्मी भैलं सुभाय् देछानादीगु खः ।