बुधवाः चीहाः संकिपा ‘उच्च शिक्षा’या प्रिमयर

किपू(नेपालभाषा टाइम्स)- उच्च शिक्षा अध्ययनया निंतिं विदेशय् वनेगु व उकिं ब्वलनीगु समस्यायात कयाः चित्रण यानाः दयेकातःगु चीहाः संकिपा ‘उच्च शिक्षा’या प्रिमियर वइगु बुधवाः किपू सिनेप्लेक्सय् जुइगु जूगु दुसा बिहीवाः निसें युट्युबय् नं सार्वजनिक जुइगु जूगु दु ।

शनिवाः छगू पत्रकार सम्मेलनय यासें मगन इन्टरटेनमेन्टं निर्माण याःगु चीहाः संकिपा‘उच्च शिक्षा’ बारे जानकारी बिउगु खः । पत्रकार सम्मेलनय् संकिपाया च्वमि व निर्देशक रजिन महर्जन, संकिपाया मू कलाकार लक्ष्मीकुमार महर्जन उदास, क्रिशल श्रेष्ठ, संकिपाकःमिलिसें प्राविधिक सुदीप भुजुं उच्च शिक्षा चीहाः संकिपाय् दुथ्यानाच्वंगु पक्षयात कयाः जानकारी बियादीगु खः ।

थौंया न्हू पुस्तायाके उच्च शिक्षा अध्ययनया निंतिं विदेशय् वनेगु मोह अप्वया वनाच्वंगु व थ्व क्रमं निरन्तरता कयाच्वंगु, थुकिं यानाः समाजय् सामान्य वर्गया परिवारय् गुकथंया लिच्वः लानाच्वंगु दु धइगु विषय संकिपा क्यनेत स्वयागु खँ निर्माण पक्षं जानकारी बिउगु दु ।

ज्याझ्वलय् न्ववासें निर्देशक महर्जनं नेवाः संकिपाया ल्याः जक अप्वयेकेगु मखु गुणस्तरीय संकिपा दयेके अावश्यक दुगु खँ धासें थःपिंसं गुणस्तरीय संकिपा दयेकेगु कुतः यानागु खँ धयादीगु खः । अथेहे थुगु चिहाः संकिपाय् मू भूमिकाय् म्हितादीम्ह लक्ष्मीकुमार महर्जनं संकिपाय् थाैंकन्हय् हरेक छेँय् वयाच्वंगु समस्यायात न्ह्यब्वयेगु कुतः जूगु धासें थःगु छेँय् नं थज्याःगु समस्या दुगु व संकिपा स्वयेधुंकाः थःगु छेँया समस्या ज्यनी अाशा यानागु खँ धयादीगु खः ।

सम्बन्धित बुखँ

LEAVE YOUR COMMENTS