न्यूयोर्कं लिहां वल प्यम्ह द्यः
येँ (नेपालभाषा टाइम्स)÷अमेरिकाया न्यूयोर्कय् अलपत्र अवस्थाय् लानाच्वंगु नेपाःया प्यम्ह द्यःपिनि मूर्ति न्यूयोर्कय् च्वंपिं नेवाःतय् संस्था न्यूयोर्क नेवाः गुथिया विशेष पहलं नेपाः लित हयेत ताःलाःगु दु । थ्व प्यम्हं द्यःपिं नेपाःया थीथी थासं खुयाः अमेरिका थ्यंकातःगु खः ।
आः नेपाः लित हयेत्यंगु मूर्तित उमामहेश्वर, दुर्गा व भैरवया निपाः ख्वाःपाः खः । थुकी मध्ये उमामहेश्वरया मूर्ति १६ औं शताब्दीयागु खःसा थ्व यल महानगरपालिका वडा नं. ९ स्थित ओम बहालं खुया यंकूगु खः । अथे हे भैरवया निपाः ख्वाःपाः १६ औ शताब्दीयागु खः । सिजःयागु थ्व निपाः मध्ये छपाः दोलखायागु खःसा छपाः नेपाःयागु हे खः धइगु पत्ता लगे जूगु दु तर थाय् धाःसा सी मदुनि । अथे हे दुर्गाया मूर्ति १७ औं शताब्दीयागु खः । थ्व ख्वपया हनुमानघाटं खुया यंकूगु खः ।
प्यम्ह मध्ये भैरवया निपाः ख्वाःपाः ज्वनाः न्यूयोर्क नेवाः गुथिया नायः विजयमान सिं व दांभरि प्रेमगोपाल महर्जन नेपाः थ्यंकः वःगु दु । मेम्ह निम्ह द्यःया मूर्ति म्हिगः सिपमेन्ट जुइधुंकूगु दुसा आः स्वन्हु प्यन्हुं नेपाः थ्यनीगु खँ धाःगु दु । नेपाः हयाः थ्व मूर्तित थनया पुरातत्व विभागयात लःल्हायेगु ग्वसाः दुगु खँ नायः विजयमान सिं कनादीगु दु ।
भाजु सिं ‘नेपालभाषा टाइम्स’ यात कनादीकथं थ्व मूर्ति अमेरिकाया टेक्सास, न्यूयोर्कया रविन म्युजियमय् तयातःगु खः । अमेरिकाय् च्वंपिं नेपाःमित लिसें अनुसन्धाता मय्जु हिलारी चेजं थ्व नेपाःयागु हे मूर्ति खः धकाः प्रमाणित यासें नेपाःयात हे लित बीमाः धकाः पैरवी यानादीगु खः । वयां लिपा थीथी थासय् च्वंगु नेपाःया थ्व मूर्तित संकलन यानाः न्यूयोर्कस्थित नेपाःया जनरल काउन्सिल अफ न्यूयोर्कयात बुझे याःगु खः ।
काउन्सिलपाखें थ्व मूर्तित नेपाः लित छ्वयेगु व्यवस्था यायेमाःगु खः तर बजेट अभाव जुयाः अन अथें तयातःगु जुयाच्वन । न्यूयोर्कय् नेपाःया मूर्तित अलपत्र अवस्थाय् लानाच्वन धइगु जानकारी वयेवं न्यूयोर्क नेवाः गुथिपाखें थःथःपिंसं हे चन्दा म्हयाः थ्वयात नेपाः लित छ्वयेगु व्यवस्था याःगु खः । पुरातत्व विभागयात लःल्हायेधुंकाः थ्व मूर्तित आःयात छाउनी म्युजियमय् तइगु खँ नं भाजु सिं कनादीगु दु ।
नेपाःया द्यः लित हयेगु भिंगु ज्या याःगु धासें म्हिगः विजयमान सिं व प्रेम गोपाल महर्जनयात सम्पदा अभियन्तापिं शैलेश बरे व रवि शाक्यं ख्यें सगं बियाः हनेज्या याःगु खः ।
LEAVE YOUR COMMENTS