खिचालिसे नां ज्वःलायेवं

जनावर व झंगःपछि लहीगु मनूतय् छगू सोख खः । थःगु सोख पूरा यायेत मनूतय्सं जनावर व झंगःपछि लही । थथे लहिनातइपिं मध्ये यक्वसिनं थःगु छेँय् खिचा हे लहीगु यानातःगु दु । छेँया सुरक्षा नं जुइ धइगु विचारं यक्वसिनं खिचा हे लहीगु याइगु खः । थथे लहिना तःपिं जनावर, झंगःपछियात इमिसं नां नं बियातःगु दइ ।

ता कि इमित याउँक व अःपुक थः थाय् सःते फयेमा धकाः थथे नां छुइगु खः । तर थ्व हे नां नं मनूतय् निंतिं गबलें गबलें तसकं घाघः जुइगु जक मखु समस्या हे नं जुया बी यः । थज्याःगु हे छगू घटना चीनय् जूगु दु । चीनया अनहुइ प्रान्तय् छम्ह मनुखं लहिनातःपिं खिचाया कारणं प्रहरी चौकीइ कुंका च्वनेमाःगु दु ।

प्रान्तया सी प्याङ नांया ३१ दँ दुम्ह छम्ह ल्याय्म्हं थःगु छेँय् निम्ह खिचा लहिनातःगु खः । वं लहिनातःपिं निम्हमध्ये छम्ह खिचाया नां छङ क्वान व मेम्ह खिचाया नां शि क्वान तयातःगु जुयाच्वन । प्याङं लहिनातःपिं थ्व हे निम्ह खिचाया नांया कारणं व प्रहरी चौकीइ कुंका च्वनेमाःगु खः । उकिया कारण छु धाःसा निम्हं खिचाया नां सरकारी अधिकारीलिसे ज्वःलाःगुलिं खः ।

चिनिया सरकारी अधिकारीतय् थःपिनिगु बेइज्जत यायेत स्वःगु धासें प्रान्तया यिङ चोउ प्रहरी ज्याकुथिं थुकथंया पलाः न्ह्याकूगु खः । न्हापा ला थ्व खः प्रहरी मसिउ तर जब प्याङं थम्हं लहिनातःपिं खिचाया नां सामाजिक संजाल ‘वी च्याट’य् पोस्ट यात वयां लगत्तै हे वयात प्रहरीं ज्वंगु खः ।

प्रहरीं प्याङयात ज्वनाखतं चीनय् छेँ लहीपिं सुं नं जनावरया नां सरकारी अधिकारीया नामं तयेगु गैरकानूनी जूगु स्पष्ट याःगु दु । प्याङयात ज्वने धुंकाः आः वयात १० न्हुया निंतिं हिरासतय् तइगु जूगु दु । चीनया सुरक्षा कानून अन्तर्गत प्याङयात थ्व सजाय बिउगु खः । प्रहरीया कथं छङ क्वान प्रान्तया नगर क्षेत्रय् जुइगु अपराध नियन्त्रण याइम्ह अधिकारी खःसा शि क्वान अनौपचारिक सामुदायिक कार्यकर्ता खः ।