ने. सं. ११४४ कौलाथ्व षष्ठी -

अमेरिकाय् हाकनं अश्वेतया हत्या

एजेन्सी – अमेरिकाय् प्रहरीं हाकनं छम्ह अश्वेत नागरिकयात स्याःगु दु। अमेरिकाया एटलान्टाय् रेशर्ड ब्रुक्स नांया हाकु जातियाम्ह छम्ह २७ दँया ल्याय्म्हयात प्रहरीं गोली कयेकाः स्याःगु खः । थ्व घटना लिपा एटलान्टाया प्रहरी प्रमुख एरिका शील्ड्सं राजीनामा बिउगु दु।

अमेरिका जर्ज फ्लाइड नांयाम्ह छम्ह हाकु वर्णया मनूयात छम्ह प्रहरी अधिकारीं गःपतय् पुलिं त्यलाः स्यानाबिइवं वंगु स्वाः न्ह्यव निसें तःधंगु प्रदर्शन जुयाच्वंगु दु। थ्व हे झ्वलय् हाकनं मेम्ह छम्ह अश्वेतया प्रहरीपाखें हत्या जूगु खः ।

जर्जिया ब्यूरो अफ इन्भेस्टिगेशन (जीबीआईं) ब्रुक्सया हत्यायात कयाः अनुसन्धान न्ह्याकाच्वंगु दु। जीबीआईया कथं ब्रुक्स लँ दथुइ कारय् हे द्यना बीवं सतक जाम जुल, थ्व लिपा प्रहरीं वयात अनया वेन्डीज नांया रेष्टुराँय् सःतूगु जुयाच्वन ।ब्रुक्सया मापसे परीक्षण याःबलय् अय्लाः त्वनातःगु सीदत, तर व गिरफ्तार जुइत माने मजुल । थ्व लिपा व प्रहरीया टेजर धाइगु छगू विद्युतिय हतियार लाकाः बिसिउँ वन । थ्व हतियार मनूयात विद्युतीय झट्का बियाः अस्थायी रुपं पक्षाघात याइगु हतियार खः । ब्रुक्सं व हतियारं छम्ह प्रहरी अधिकारीयात ताके यायेवं प्रहरीं गोली कयेकूगु खः ।

प्रत्यक्षदर्शी छम्हेसिनं कयातःगु भिडियोय् ब्रुक्सं प्रहरीयात टेजरं ताके यायेवं प्रहरीं नं वयात टेजरं कयेकूगु खः । थ्व लिपा प्रहरी अधिकारी भिडियो फ्रेमय् खनेदइमखु। तर भचा जायेवं बन्दूकया सः तायेदइ, अले ब्रुक्स बँय् ग्वःतूवनी । वयात अस्पताल यंकी, तर वया मृत्यु जुइधुंकी ।

थ्व घटना लिपा शुक्रवाःनिसें हे हाकनं प्रदर्शन तच्वया वःगु दु। प्रदर्शनकारीतय्सं आः ब्रुक्सया नां व ब्ल्याक लाइभ्स म्याटर धयागु सन्देश च्वयातःगु प्लेकार्ड प्रदर्शन यानाच्वंगु दु। अमेरिकाया मेमेगु शहरय् नं जर्ज फ्लोयडया हत्यायात कयाः जुयाच्वंगु प्रदर्शन न्ह्याना हे च्वंगु दनि ।