
लन्दन (एजेन्सी) – बेलायतय् महामारीया कारणं आः स्वयां नं तसकं खराब दिं वये फइगु ख्याच्वः चिकित्सकतय्सं बिउगु दु। बेलायतया वरिष्ठ चिकित्सा सल्लाहकारतय्सं कोरोना भाइरसया कारणं वइगु दिनय् देशय् आः स्वयां नं बांमलाःगु व खराब दिं वये फइगु ख्याच्वः बिउगु खः ।
वरिष्ठ चिकित्सा सल्लाहकारतय्सं आःया स्थितियात व्यवस्थापन याये मफुगु अवस्थाय् वइगु दिं खराब जुइगु ख्याच्वः बिउगु खः। कोरोना भाइरस महामारीया लिपांगु अवस्था स्वयेबलय् व उकियात आवश्यककथं उच्च व्यवस्थापन याये मफुत धाःसा वइगु दिनय् आः स्वयां नं खराब स्थिति सिर्जना जुइगु ख्याच्वः बिउगु खः ।
बेलायती स्वास्थ्यविज्ञतय्सं देशय् कोरोना महामारी निगूगु लहरय् वःगु व उकिं क्वय्या तहय् तक व न्हापा स्वयां नं अप्वः लिच्वः लाके फुगु विश्लेषण नं याःगु दु। बेलायतय् निगूगु चरणया कोरोनाया महामारी न्हियान्हिथं अप्वया वनाच्वंगु दु। निगूगु चरणया महामारी वाःपतिकं निदुगं मल्याक संक्रमित अप्वया वनाच्वंगु व न्हापांगु चरणय् स्वयां तीव्र रुपं संक्रमित अप्वया वनाच्वंगु विज्ञतय् धापू दु ।
बेलायतया प्रमुख वैज्ञानिक अधिकृत प्याट्रिक भेलान्सं महामारी न्यना वनेगुपाखें पनेत दकलय् न्हापां तीव्र व प्रभावकारी उपाय अवलम्बन यायेमाःगु खँ धाःगु दु। आपालं बेलायतीतय्कै गलत मानसिकता दयाच्वंगु व थुकिं बांमलाःगु स्थितिइ तक थ्यंके फइगु खँय् नं वय्कलं चिउताः प्वंकादीगु दु ।
थ्व झ्वलय् बेलायतय् संक्रमित अप्वया वनाः चिन्ताजनक स्थिति ब्वलना वनाच्वंगु इलय् बेलायती प्रधानमन्त्री बोरिस जोन्सनं छुं दिंया दुने प्रतिबन्धात्मक घोषणा याये फइगु अनुमान नं जुयाच्वंगु दु ।
LEAVE YOUR COMMENTS