ट्रम्पयात विषालु पौ छ्वःम्ह ज्वन

न्यूयोर्क – अमेरिकी राष्ट्रपति डोनाल्ड ट्रम्पयात विषालु पदार्थयुक्त पौ छ्वःम्ह छम्हेसिया पहिचान जूगु दु। ट्रम्पयात विषालु पदार्थयुक्त पौ छ्वःम्ह मिसाम्ह खः। उम्ह मिसा क्यानेडियन नागरिक जूगु व गैरकानूनी आप्रवासी जूगु संचारमाध्यमं न्ह्यथंगु दु। थःगु भिसा अवधि सिधयेधुंकाः नं नक्कलि लाइसेन्स दयेकाः गाडी चले यानाच्वंगु इलय् प्रहरीं वयात न्यूयोर्कं लिक्कं ज्वंगु खः ।

‘न्यूयोर्क पोष्ट’या कथं ट्रम्पयात विषालु पदार्थयुक्त पौ छ्वःगु आशंका यानाःम्ह उम्ह मिसा क्युबेकया ५३ दँ दुम्ह खः । पास्कल फेरियर नांया उम्ह मिसायात सन् २०१९ मार्च महिनाय् प्रहरीं थःगु हिरासतय् काःगु खः । उगु इलय् थःगु भिसा अवधि सिधयेधुंकाः नक्कलि लाइसेन्स दयेकाः गाडी चले यानाच्वंगु अवस्थाय् ज्वंम्ह पास्कल २० न्हुतक जेलय् च्वनेधुंकाः निर्दोष सावित जुइवं जेलं पिहां वःगु खः ।

जेलं पिहां वयाखतं वयात क्यानाडाया निंतिं निष्काशन याःगु खः । टेक्सास राज्यया आप्रवासन आधिकारीतसं पास्कलया अन्तिम निशाना राष्ट्रपति ट्रम्प जूगु व थःपिंत नं उकथंया हे पौ छ्वया हःगु दावी याःगु दु। अमेरिकी अधिकारीतय्कथं ट्रम्पयात संबोधन यानाः ह्वाइट हाउसय् छ्वयाहःगु शंकास्पद पती ‘रिसिन’ नांया विषालु पदार्थ तयातःगु लूगु खः ।

अमेरिमी संघीय जांच ब्यूरो व सिक्रेट सर्भिसया प्रारम्भिक छानविनकथं उगु पौ क्यानाडां हे छ्वया हःगु खयेमाः धइगु अनुमान याःगु दु ।