सभामुख सानुकुमार श्रेष्ठपाखें पदबहाली

प्रदेश नं. ३ या नवनिर्वाचित सभामुख सानुकुमार श्रेष्ठं शनिवाः हे पदभार ग्रहण यानादीगु दु । वय्कःयात प्रदेश प्रमुख अनुराधा कोइरालां सभामुखया शपथ ग्रहण याकादीगु खः । पदभार ग्रहण यानादिसें सभामुख श्रेष्ठं देय्या संविधानयात आत्मसात यासें दिगो शान्ति व स्थायित्वया निंतिं थःम्ह सकलें राजनीतिक दललिसे सहकार्य यानाः प्रदेश सभाया गरिमायात उच्च याना तयेगु प्रतिबद्धता प्वंकादीगु दु ।

शनिवाः हे जूगु सभामुखया निर्वाचनय् भाजु श्रेष्ठ निर्विरोध निर्वाचित जुयादीगु खः । वय्कल) माओवादी केन्द्रया प्रदेशसभा सदस्य शालिकराम जमरकट्टेलया प्रस्ताव व एमलोया रामेश्वर फुँयालया समर्थनय् उम्मेदवारी बियादीगु खः । वय्कःया बाहेक सभामुखय् मेपिं सुयां उम्मेदवारी मलायेवं निर्विरोध निर्वाचित जूगु घोषणा याःगु खः ।

येँ मनपा ३२ वडा, कोटेश्वरय् च्वनादीम्ह ५८ दँया श्रेष्ठ थ्वयां न्ह्यः येँ जिविसया सभापति जुयादीधुंकूम्ह खः ।
शनिवाः च्वंगु प्रदेश सभाया बैठकं आइतवाः उपसभामुखया चुनाव यायेगु तालिका क्वःछिउगु खः । न्हिनय् २ बजे च्वनीगु बैठकं उपसभामुख ल्यइ । उपसभामुखय् नं माओवादी केन्द्रया उम्मेदवार निर्विरोध त्याइगु सम्भावना दु । माओवादी पाखें राधिका तामांगं उपसभामुखया उम्मेदवारी बी ।