येँ महानगर स्वीस टुरिजम अवार्डय् छनोट

येँ(नेपालभाषा टाइम्स)- येँ महानगरपालिका ‘स्वीस टुरिजम अवार्ड–२०२३’या निंतिं छनोट जूगु दु । स्वीट्जरल्याण्डया लुगानो सहरय् जुइगु अवार्ड ज्याझ्वःया निंतिं ग्वसाः खलकं येँ महानगरपालिकाया मेयर बालेन्द्र शाह (बालेन)यात पौ छ्वयाः उकिया जानकारी बिउगु खः ।

वइगु नोभेम्बर ३ निसें ५ तारिखतक स्वीट्जरल्याण्डया लुगानो सहरय् जुइगु अवार्ड ज्याझ्वःया निंतिं येँ महानगरया मेयर शाहयात छ्वया हःगु ब्वना पती ग्वसाः खलकं ‘पर्यटन ख्यःया वैज्ञानिक पेशाकर्मीतय् निर्णायक समितिं अवार्गया निंतिं छनोट याःगु खः । थुगु ख्यःया आयामिक पक्षयात आम जनताया दथुइ परिचित याकेगु, पर्यटन गन्तव्यया विशिष्ठताया प्रवद्र्धन यायेगु थुगु ज्याझ्वलय् ब्वति कयादीत ब्वना च्वना’ धयातःगु दु ।

वंगु झिंन्यादँ न्ह्यःनिसें जुयाच्वंगु थुगु अवार्डया निंतिं महानगरपालिका, उपमहानगरपालिका व नगरपालिका थेंज्याःगु स्थानीय तहं आवेदन बी फइगु व आवेदकतपाखें निश्चित ल्याखय् अवार्डया निंतिं मनोनयन याइगु ग्वसाः खलकं धाःगु दु ।

ये महानगरयात छ्वया हःगु पती येँ देय्या सांस्कृतिक, धार्मिक, ऐतिहासिक व पुरातात्विक इतिहास, मूर्त व अमूर्त सम्पदा, जीवन्त सहरी वातावरणं आगन्तुकयात मोहित यायेगु यानाच्वंगु व थुकिं विश्वन्यंकंया पर्यटकतय्त मोहित याइगु खँ न्ह्थनातःगु दु ।

प्राकृतिक व सांस्कृतिक सम्पदायात पर्यटकीय गन्तव्यया रुपय् प्रवद्र्धन यायेगु, पर्यटन सेवा मापदण्डयात प्रतिस्पधी दयेकेगु, पर्यटन विकासया सम्भावना उच्च यायेगु, गन्तव्यतय् संचार व बजारीकरण यानाः सौखिन पर्यटकतय् थाय्तक सूचना थ्यंकेत ग्वाहालि यायेगु अवार्ड ज्याझ्वःया मुख्य उद्देश्य जूगु नं पती न्ह्यथनातःगु दु ।

अवार्ड ज्याझ्वलय् स्वीट्जरल्याण्ड, इटालीलिसें अन्तर्राष्ट्रिय क्षेत्रय् पर्यटकीय गन्तव्यया प्रचार यायेगु व सम्मानित सहरय् पर्यटनया मूल्य, मान्यता व पेशाया विषयय् नं चर्चा याइ धाःगु दु ।