नेपाः–इजरायल दथुइ कोरोनाया अनुभव कालबिल यायेत समिति

येँ – नेपाः व इजारल दथुइ कोरोनाया बारे ज्ञान व अनुभव कालबिल यायेगु निंतिं छगू समिति नीस्वंगु दु । निगू देय्या चकित्सक नापं सम्बन्धित अधिकारीत दुथ्याकाः ‘नेपाः-इजरायल कोरोना इनिसिएटिभ’ नांया छगू समिति नीस्वंगु खः ।

समितिइ निगूलिं देय्या विशषज्ञ डाक्टरत व विज्ञतय् दुजः कथं च्वनादीगु दु । उगु समितिं नेपालय् कोरोनाया वासः नापं आइसोलेसन व्यवस्थापनय् ग्वाहालि याइगु व निगू देय् दथुइया अनुभव कालबिल याइगु खँ धाःगु दु ।

इजरायल स्थित नेपाःया राजदूतावासया निरन्तर कुतः व समन्वय लिपा कोरोना महामारीपाखें लाइगु लिच्वः म्हो यायेगु व आवश्यक मेडिकल व्यवस्थापन यायेत समिति नीस्वनेगु ज्या जूगु खँ राजदूत डा. अञ्जान शाक्यं धयादिल ।

समितिइ नेपाःया पाखें स्वास्थ्य सेवा विभागया महानिर्देशक डा. दिपेन्द्र रमण सिंह, नेपाल मेडिकल काउन्सिलया अध्यक्ष डा. भगवान कोइराला, राष्ट्रिय जनस्वास्थ्य प्रयोगशालाया निर्देशक डा. रुना झा लगायत झिंन्याम्ह दुसा इजरायलयापाखें न्याम्ह प्रतिनिधित दुजः कथं च्वनादीगु दु ।