ब्वनेकुथिया फोहर व्यवस्थापन ब्वनेकुथिइ हे

येँ(नेपालभाषा टाइम्स)÷येँ महानगरपालिकां आवंलि सामुदायिक ब्वनेकुथिया फोहर पिने महसे ब्वनेकुथि दुने हे व्यवस्थापन यायेगुकथंया योजना हःगु दु । येँ महानगरपालिका वातावरण व्यवस्थापन विभागं महानगरया सामुदायिक ब्वनेकुथिया फोहर पिने हयाः व्यवस्थापन यायेगु मखसे ब्वनेकुथिइ हे कम्पोष्ट मल उत्पादन यायेगु योजना न्ह्यःने हःगु खः .

थ्व झ्वलय् विभागं थनया दल्लुइ च्वंगु गीतामाता माध्यमिक विद्यालयय् उत्पादन जूगु जैविक फोहर व्यवस्थापनया निंतिं कम्पोष्टिङया ज्या न्ह्याकूगु दु । फोहरयात स्रोतय् हे वर्गीकरण यायेगु व जैविक फोहरयात उत्पादन जूगु थासय् हे ज्याःगु फोहरयात व्यवस्थापन यायेगु ज्याझ्वःया प्रवद्र्धन यायेगु ल्याखं विभागं विद्यालयय् उत्पादन जूगु फोहर कम्पोष्टिङ यायेगु शुरु याःगु खः । सामुदायिक ब्वनेकुथिइ न्हापांखुसी थुकथंया कुतः यायेगु झ्वलय् विद्यालयया विद्यार्थीतय्सं नःगु नसाज्वलंपाखें उत्पादन जूगु फोहरयात आः विद्यालयं पिने हयाः व्यवस्थापन मयाइगु जूगु दु ।

येँ महानगरपालिकाया प्रवक्तालिसें १७ वडाअध्यक्ष नविन मानन्धरं उगु योजनाया शुरुवात यानादिसें सहरयात प्रदूषण मुक्त यायेत सकसिगुं भूमिका महत्वपूर्ण जुइ धयादिल । ‘लः, फय्, चाः, सः आदि दक्वं थासय् अनेककथंया प्रदूषणया समस्या दुगु व थुपिं दक्वं समस्या समाधान यायेत समाजय् च्वनीपिं सकसिगु समान जिम्मवारी दु, उकियात पूवंकेगु स्वयेमाः’ प्रवक्ता मानन्धरं धयादिल ।

येँ महानगर वातावरण समितिया संयोजकलिसें १२ वडाअध्यक्ष बालकृष्ण महर्जनं जैविक फोहरयात छेँय् हे व्यवस्थापन यायेगु ज्याय् स्थानीयवासीया ग्वाहालि दत धाःसा महानगरया गाक्कं खर्च बचे जुइ नापं स्वच्छ वातावरण निर्माण यायेत नं ग्वाहालि जुइ धयादिल ।

येँ महानगर १५ वडाअध्यक्ष ईश्वरमान डंगोलं सकसिनं ध्यान ततःधंगु योजनाय् जक वनाच्वंगु दु धासें फोहर व्यवस्थापनया ज्या महानगरपालिकाया खः धकाः थः लिचिलेगु यानाच्वंगु व थज्याःगु ज्या स्वयेबलय् चिधं जूसां मानव सभ्यता व वातावरणया निंतिं तःधंगु योगदान जुइ धयादिल ।

विद्यालयया प्रधानाध्यापक हरिकृष्ण श्रेष्ठं थःगु विद्यालयय् तःगु सामुदायिक कम्पोष्ट विनं विद्यालयया फोहर व्यवस्थापनलिसें विद्यार्थीपाखें समुदायय् घरेलु फोहर व्यवस्थापनया सन्देश बीत सफल जुइगु विश्वास प्वंकादिल । विभागं नमूनाया निंतिं ब्वनेकुथिइ कम्पोष्ट मल उत्पादन यायेत कम्पोष्ट विन नं तःगु दु ।