त्यःरया पिलातुं गुथिया छेँ शिलान्यास

येँ- येँ महानगरपालिका २७ वडास्थित बेखालाछि मागय् पिलातुं (त्यःर) गुथिया छेँ शिलान्यास याःगु दु । येँ महानगरपालिकाया प्रमुख विद्यासुन्दर शाक्यं वंगु शनिवाः छगू ज्याझ्वःया दथुइ पिलातुं दाफा खलःया उगु गुथि छेँया शिलान्यास यानादीगु खः ।

येँ महानगरपालिका सस्म्पदा तथा पर्यटन विभागं उगु गुथिया छेँ निर्माणया निंतिं वंगु पुस २८ गते बिउगु कार्यादेशकथं छगू करोड तका विनियोजन याःगु खः । शिलान्यास ज्याझ्वः लिपा येँ महानगर प्रमुख शाक्यं सम्पदा संस्कृति बचे यायेत महानगरं यानाच्वंगु लगानीइ अप्वयेकागु जानकारी बियादिल ।

‘सम्पदा बचे यायेत राज्यपाखें महानगरं ध्यबा बिउगु खः । थ्व खर्च मखु, लगानी खः’ महानगर प्रमुख शाक्यं धयादिल, ‘थज्याःगु सम्पदायात पर्यटनलिसे स्वाना यंकल धाःसा ध्यबा वयेगु शुरु जुइ । उकिं जिमिसं सम्पदायात पर्यटनलिसे स्वानाः व्यापारपाखें स्थानीयवासीया आय अप्वयेकेत लगानी यानागु खः ।

स्थानीय निर्वाचनया प्रसंगयात कयाः वय्कलं इलय् हे निर्वाचन जुइ धइगु खँय् थः आशावादी दु धासें स्थानीय निकाय जनप्रतिनिधिविहीन जुइगु अवस्थाय् थ्यनी मखु सरकारं इलय् हे सही निर्णय याइ धइगु खँय् थः विश्वस्त दु धयादिल ।

येँ महानगरपालिका उपप्रमुख हरिप्रभा खड्गी श्रेष्ठ, २७ वडाअध्यक्ष चिनियामान वज्राचार्य, १८ वडाअध्यक्ष न्हुछेकाजी महर्जन, उपभोक्ता समितिया अध्यक्ष लक्ष्मीनारायण महर्जनलिसें जनप्रतिनिधि व गुथ्याःतय् नं उपस्थिति दुगु ज्याझ्वलय् वडाअध्यक्षद्वयं नं थःथःगु नुगःखँ तयादीगु खः ।