चिलीइ ३५ दँ दुम्ह नेता ग्याब्रियल बोरिक राष्ट्रपति

एजेन्सी- चिलीइ ३५ दँ दुम्ह कम्युनिष्ट नेता ग्याब्रियल बोरिक राष्ट्रपतिइ निर्वाचित जूगु दु । दक्षिणपन्थी नेता जोस एन्टोनियो कास्टयात १२ प्रतिशत मतं बुकाः ग्याब्रियल बोरिक राष्ट्रपतिइ निर्वाचित जूगु खः । मतगणना बछि जक क्वचाःगु स्थितिइ कास्टं थः बूगु स्वीकार याःगु खः । बोरिकं चुनावय् ५६ प्रतिशत व कास्टं ४४ प्रतिशत मत काःगु खः । चुनाव त्याकूम्ह ग्याब्रियल बोरिक विश्वया हे आतकयाम्ह दकलय् क्वाकालिम्ह राष्ट्रपति जूगु दु ।

बोरिकं विद्यार्थी राजनीतिं थहांवःम्ह नेता खः । सन् २०१९ व सन् २०२० य् चिलीइ असमानता व भ्रष्टाचारया विरोधय् जूगु आन्दोलनय् बोरिकं मू भुमिका म्हितूगु खः । वयां न्ह्यः सन् २०११–१२ य् बोरिकं विश्वविद्यालय् शिक्षा सितिकं जुइमाःगु माग तयाः आन्दोलनय् न्ह्यलुवाः जुया ज्या याःगु खः । सन् २०१३य् बोरिक स्वतन्त्र उम्मेदवार जुयाः क्वय्या सदनय् त्याकूगु खः । लिपा बोरिक सोशल कन्भर्जेन्स पार्टीेइ दुहां वंगु खः ।

संयुक्त राष्ट्र संघया कथं चिलीया २५ प्रतिशत सम्पतिइ छगू प्रतिशत मनूतय्सं कब्जाय् कयातःगु दु । बोरिकं थ्व समस्या ज्या याना सुधार हयेगु धासें चुनावया प्रचार याःगुु खः ।

सम्बन्धित बुखँ

LEAVE YOUR COMMENTS