दछिया छन्हु अल्सितय् निंतिं

मनूत सतकय् अबलय् कुहां वइ, गबलय् छुं नं आन्दोलन यायेमाल वा धर्ना च्वने माल वा छुं कथंया ¥याली पिथनी । थथे आन्दोलन, धर्ना वा छुं नं कथंया विरोध यायेमाल कि मनूत सतकय् कुहां वइगु जक मखु, सतकय् द्यनीगु नं झीसं खना वयाच्वनागु खः । थ्व संसारय् छगू अज्याःगु नं देय् दु, गन दछिया छक्वः मनूतय्सं सतक हे कब्जा याइ ।

थथे सतक कब्जा याइपिं इमि आन्दोलनकारी, धर्ना, जुलुस प्रदर्शन याइपिं मखु, इपिं खः अल्सित । थुपिं अल्सितय्सं दछिया छन्हु सतकय् कुहां वयाः सतक छगुलिं थःगु कब्जाय् काइगु खः । उकिया निंतिं थीथी देशं तकं अल्सिपिं मनूत उगु देशय् थ्यंकः वइ । अझ न्ह्यइपुगु खँ ला थ्व दु कि इपिं अथें वइमखु, इमिसं थः नापं द्यनेत लासाफांगा, टेन्ट, शायर तकं ज्वना वइ अले याउँक सतक कब्जा यानाः लँय् हे द्यनी ।

थथे सतक हे कब्जा यानाः उकिसनं लासा लानाः द्यनीगु देय् खः कोलम्बिया । अले इमिसं थ्व न्हियात अल्सि दिवसया रुपय् हनीगु खः । थुगु दिवस न्यायेकेत संसारन्यंकंया अल्सिपिं कोलम्बियाय् थ्यंकः वइ ।

थुगुसी नं वंगु छुं दिं न्ह्यः न्यायेकूगु अल्सि दिवसय् ब्वति कायेत विश्वया द्वलंद्वः अल्सित कोलम्बियाया इतागुइ सहर थ्यंकः वंगु खःसा इपिं सकसिनं लँय् लासा लायाः द्यंगु खः । इपिं सकसिनं सहरन्यंकंया सतक कब्जाय् कयाः न्हिछियंकं सतकय् द्यनाः अल्सि दिवस हंगु खः ।

सन् १९८५ निसें न्यायेकेगु याना वयाच्वंगु थ्व दिवसया हे झ्वलय् सु याकनं द्यनी, सुयागु लासा बांलाः, सुयागु वसः बांलाः, सुयागु खाता आकर्षक, सु आरामपूर्वक द्यनी धइगु थीथीकथंया कासा नं जुइगु याइ ।