पाकिस्तानय् श्रीलंकाया नागरिकयात दा जक दायाः स्याःपिं खुम्हेसित मृत्युदण्ड

एजेन्सी- पाकिस्तानय् ईशनिन्दा (छुं नं धर्मया अपमान जुइकथं नवायेगु) याःगु द्वपनय् छम्ह श्रीलंकाया नागरिकयात भिडं दा जक दायाः स्याःगु खः । उगु भिडय् दुथ्याःपिं खुम्हेसित पाकिस्तानय् मृत्युदण्ड बिउगु दु । उगु घटनाय् मुक्कं ८८ म्ह दोषी ठहर जूगु खः । घटनाय् दुथ्याःपिं ९ म्हेसित आजीवन कारावासया सजाय बिउगु दुसा मेपिंत निदँ निसें न्यादँ जेल सजाय बिउगु दु ।

वंगु डिसेम्बरय् पाकिस्तानया सियालकोट च्वंगु कारखानाया प्रबन्धकय् ज्या यानाच्वंम्ह ४८ दँ दुम्ह प्रियन्त दियावादानागेयात ईशनिन्दा याःगु द्वपं बिसें दा जक दायाः स्याःगु खः । वयात स्याये धुंकाः सीम्ह नं च्याकाबिउगु खः ।

सामाजिक सञ्जालय् खनेदुगु भिडियोय् भीडं श्रीलंकाया नागरिक दियावादानागेयात ज्याकुथिं लुया हयाः दाःगु खः । छुं मनूतय्सं सिम्ह मनू नाप च्वनाः सेल्फी नं काःगु खः । सीम्ह दियावादानागेया कलाः निलुशी दियावादानागें घटनायात अत्यन्त अमानवीय धाःगु दु ।

थ्व घटनायात कयाः पाकिस्तान स्तब्ध जूगु दु । पाकिस्तानया पुलांम्ह प्रधानमन्त्री इमरान खानं उगु घटना जूगु न्हियात ‘लज्जाया न्हि’ धाःगु दु ।