राधादेवी जोशीया सीम्ह अस्पतालयात लःल्हात

यल (नेपालभाषा टाइम्स)- वाङ्मय शताब्दी पुरुष सत्यमोहन जोशीया जहान राधादेवी जोशी सीम्ह क्रिष्ट अस्पतालयात दान याःगु दु । वय्कः शनिवाः सुथय् सुथय् मदुगु खः वंगु छुं ई न्ह्यवंनिसें सासः सम्बन्धी ल्वचं कयाः वय्कः किष्ट अस्पतालय् वासः याका च्वनादीगु खःसा शनिवाः सुथय् ५ः५६ बजे वासः याकु याकुं वय्कः मदुगु खः ।

जोशीया चिधिकःम्ह काय पूर्णराज जोशी शनिवाः हे बेलायतं येँय् थ्यंकः वयेवं वय्कःया सीम्ह अस्पतालयात दान याःगु खः । मदुम्ह जोशी १०० दँ दुम्ह खः । सत्यमोहन जोशीलिसे वय्कलं ८४ दँ ताःहाकःगु तिपू जीवन हनादीग दु । जोशीया तःधीम्ह कायभाजु अणुराज जोशीं कनादीकथं राधादेवी जोशीं नं किष्ट अस्पतालयात शरीर दान यायेगु प्रतिवद्धता प्वंकातःगु कारणं वय्कःया सीम्ह किष्ट अस्पतालयात दान याःगु खः । उकिं वय्कःया अन्तिम संस्कार सम्बन्धी छुं नं ज्या मजूगु खः ।

सत्यमोहन जोशी नं वंगु खुला न्ह्यः तिनि १०३ दँया वैंशय् मदुगु खः । जोशी मदुगुयां खुला व प्यन्हु लिपा जहान राधादेवी नं मदुगु खः । वंगु चैत २८ गते तिनि वय्कःया खुलाया श्राद्ध याःगु खः । वाङ्मय शताब्दीपुरुष सत्यमोहन जोशीं नं थः मदयेधुंकाः थःगु सीम्ह चिकित्सकीय अध्ययनया लागि किष्ट अस्पतालयात दान यानादीगु खः ।
थ्व हे झ्वलय् म्हिगः लोकसाहित्य परिषदं जोशी मदुगुलिं वय्कःया छेँजःपिंत बिचाः हायेकाः पौ लःल्हाःगु दु ।