
भ्वत – रेडियन्ट इभेन्ट म्यानेजमेन्टया ग्वसालय् जूगु मिस काभ्रे–२०१८ या उपाधी रुबिला श्रेष्ठं त्याकूगु दु । वंगु शनिवाः भ्वतय् जूगु कासाया झिगूगू संस्करणया उपाधी त्याकेत सफल रुबिलां चीनय् जुइगु मिस ग्लोब वल्र्डय् नेपाःया प्रतिनिधित्व याइगु जूगु दु । कासाय् रुबिलां उपाधीलिसें मोस्ट कन्फिडेन्ट व बेस्ट ट्यालेन्टया टाइटल नं त्याकूगु खः ।
झिगूगू संस्करणया मिस काभ्रे–२०१८ य् फस्ट रनरअप प्रियंका पाठकं मोस्ट इनर्जेटिक व सेकेन्ड रनरअप रिचा न्यौपानें भ्युअर्स च्वाइस व बेस्ट ड्रेसया अवार्ड ल्हातय् लाक । उपाधी त्याकेत सफल जूपिंत रेडियन्ट इभेन्टया संस्थापक निर्देशक राज फैजू व कार्यकारी निर्देशक श्रीषा वैदार फैजूं ताज पुइकादीगु खःसा फस्ट रनरअपयात सन् २०१५ या फस्ट रनरअप प्रशंसा मानन्धर व सन् २०१६ या फस्ट रनरअप लजना नकःमि व २०१७ या सेकेन्ड रनरअप पूनम नापितं ताज पुइकादीगु खः ।
अथे हे कासाय् थीथी उपाधी त्याकेत सफल जूपिं सकसितं हब इन्टरनेशनल एजुकेसनया सरिता खड्का, उद्धव खड्कां गिफ्ट ह्याम्पर लःल्हानादीगु खः । कासाय निंतिं अन्तर्राष्ट्रियस्तरया हे तालिम बियागु रेडियन्टया संस्थापक फैजूं कनादिल । लिसें वय्कलं मिस काभ्रेया उपाधी विजेतायात तःधंगु हे अवसर चूलाःगु नं धयादिल । आः मिस काभ्रेया उपाधी विजेतायात चीनय् जुइगु मिस ग्लोब वल्र्डया निंतिं विशेष तयारी न्ह्याकेगु योजना दुगु नं वय्कलं कनादिल ।
मिस काभ्रे–२०१८ य् थीथी टाइटल उपाधीपाखे सुस्मिता मानन्धरं मिस पर्सनालिटी, अनुषा गुरुंगं मोस्ट सिन्सियर, सदिक्षा श्रेष्ठं मोस्ट डिसिप्लेन, सबिना तामांगं, पंचुआलिटी, रोजी कपालीं फोटोजेनिक, विनिता गुरुंगं वेस्ट डान्सर, प्रभा खड्कां वेस्ट वाक त्याकेत सफल जूगु खः । निर्णायक मण्डलय् संकिपाकःमि नवल खड्का, म्येँ हालामि सत्यकला राई, संचारकःमि बिराजकाजी राजोपाध्याय, हब इन्टरनेशनलया सरिता खड्का व संचारकःमि निलिमा मास्के श्रेष्ठपिं च्वनादीगु खः ।
LEAVE YOUR COMMENTS