कल्पना महर्जन व रोजिता बुद्धाचार्य नं सगरमाथा च्वकाये

येँ – न्हापांगु मिसा पत्रकार सगरमाथा आरोहण दलया दुजः जुयाः सगरमाथा गःवःपिं नेवाः पत्रकारत कल्पना महर्जन व रोजिता बुद्धाचार्य नं सगरमाथाया सफल आरोहण यायेत ताःलाःगु दु । न्याम्ह मिसा पत्रकार दुथ्याःगु थुगु पुचःया प्यम्ह पत्रकारत सगरमाथा च्वकाये थ्यनेत ताःलाःगु दु ।

थुकिया लिसें सगरमाथाया सफल आरोहण याःपिं नेवाः मिसात न्याम्ह थ्यंगु दु । स्वन्हु न्ह्यव तिनि गोरखाया पूर्णिमा श्रेष्ठं सगरमाथाया सफल आरोहण याःगु खः । सगरमाथा गयेत ताःलाःम्ह न्हापांम्ह नेवाः मिसा मोनी मुलेपति खः ।

महर्जन व बुद्धाचार्य लिसें रोशा बस्नेत व देउराली चाम्लिङ सगरमाथा गयेत ताःलाःगु खः । पत्रकार पुचलं बुधवाः सुथय् ६ बजे सगरमाथा च्वकाये पलाः तःगु खः ।

सगरमाथा गयेत ताःलाःपिं महर्जन मेघा टेलिभिजनया, बुद्धाचार्य बिपी कोइराला मेमोरियल प्लानेटोरियम अब्जरभेटरी व विज्ञान संग्रहालयया, चाम्लिङ स्वतन्त्र पत्रकार व बस्नेत राष्ट्रिय समाचार समितिया पत्रकार खः । वय्कःपिनि पुचलय् दुथ्याःम्ह न्यूज २४ टेलिभिजनया प्रियालक्ष्मी कार्की छम्ह सगरमाथा च्वये थ्यंकेमफुगु खँ सगरमाथा आधार शिविरय् च्वंच्वनादीम्ह सम्पर्क अधिकृत ज्ञानेन्द्र श्रेष्ठं धयादीगु दु ।

थुगु पुचःया लिडर बुद्धाचार्यं सगरमाथाया च्वकाय् नेपाल पत्रकार महासंघया ध्वाँय् ब्वयेकूगु खः ।