कोरोनामुक्त जूपिं द्वःछिं अप्व थ्यन

येँ – नेपालय् कोरोनामुक्त जूपिं द्वःछिं अप्व जूगु दु । सोमवाः तकया दुने कोरोनामुक्त जूपिं द्वःछि व ४१म्ह थ्यंगु दु । वंगु नीप्यघौ दुने जक थप ६७म्ह कोरोनामुक्त जुयाः अस्पतालं डिस्चार्ज जूगु दु । स्वास्थ्य तथा जनसंख्या मन्त्रालयया प्रवक्ता डा. जागेश्वर गौतमया कथं ६०म्ह मिजंत व ७म्ह मिसात अस्पतालं डिस्चार्ज जूगु खः ।

कोभिड-१९ जनकपुरपाखें २४म्ह मिजं, पाटन अस्पतालं ३म्ह मिसा व १म्ह मिजं, कोभिड-१९ युनिफाइड कमाण्ड अस्पताल बलम्बुपाखें २म्ह मिसा व त्रिवि शिक्षण अस्पतालपाखें १म्ह मिजं व १म्ह मिसा अस्पतालं डिस्चार्ज जूगु दु ।

अथेहे कलैया अस्पताल बारां ६म्ह मिजं, साई किस्न आइसोलेसन सप्तरीपाखें १७म्ह मिजं व कोरोना विशेष अस्पताल बेलढुंगी दाङं १म्ह मिसा व ११म्ह मिजं कोरोनामुक्त जुया अस्पतालं डिस्चार्ज जूगु दु ।

आः तक नेपालय् ९ सय ३७म्ह मिजंत व १ सय ४म्ह मिसात कोरोनामुक्त जुइधुंकूगु दु ।