ने. सं. ११४६ दिल्लाथ्व पञ्चमी -

अर्जेन्टिना ‘द कमब्याक किंग’

अर्जेन्टिनाया समर्थन यासें विश्वकप २०२६ स् वयाः च्वंपिंत नं थाकुया हे च्वंगु जुइमाः । नुगः भाराभारा मिंक जक म्हितीगु । तर दकलय् तःधंगु खँ, लियोनल मेसीया कप्तानीइ अर्जेन्टिना फाइनल थ्यंगु दु, डिफेन्डिङ च्याम्पियनया ल्याखं आः टिमं उपाधि रक्षा यायेगु अवसर चूलाःगु दु । अर्जेन्टिना गुकथं फाइनल थ्यन, टिमयात थाकुसां, स्वये धाःसा हाकनं न्ह्यइपु ।

थुकिया झ्वलय् झीसं आः अर्जेन्टिनायात ‘द कमब्याक किंग’ धाःसां जिल । थुगुसीया विश्वकपया नकआउट चरणय् अर्जेन्टिनां गुलि नं कासा म्हितल, उकी छगू ई अज्याःगु वःगु हे दु, गन सकसिया नुगलय् छु वंगु दु धाःसा आः थ्व टिम छेँय् लिहां वनीगु जुल । तर अथे मजुसे अर्जेन्टिनां प्रत्येक कासाय् उत्कृष्ट पुनर्आगमन याःगु दु, उकिं हेला थ्व टिमया खँ हे मेगु ।

दकलय् न्हापां सेमिफाइनलया हे खँ । फाइनल वने त अर्जेन्टिनां इंग्ल्यान्डनाप म्हितूगु खः । थ्व कासा ऐतिहासिक ल्याखं हे तनावपूर्ण जुइगु पहःया खः । थुकिया राजनीतिक कारण नं दु । सन् ८० या दशकपाखे थुपिं निगू देय् फकल्यान्ड ल्वापुइ तक्यंगु खः । उकिं उपिं छगू कथं राजनीतिक शत्रु देय् खः आः तकं ।

हाकनं विश्वकपय् नं थुपिं निगू देय् दथुइ यक्व हे विवादं जाःगु कासा जुल । एटलान्टाय् थुपिं निगू टिम दथुइ कासा जुबलय् नं अग्रता इंग्ल्यान्डं हे काःगु खः, एन्थोनी गोर्डनया गोलं । कासाय् न्यागू मिनेट जक ल्यं दनिबलय् तक नं अर्जेन्टिना बु हे बुत धयागु स्थितिइ थ्यंगु खः । तर अथे मजुल, दकलय् न्हापां एन्जो फर्नान्डेजं ८५ औं मिनेटय् बराबरी गोल यात । अनंलि इन्ज्युरी इलय् लाउटारो मार्टिनेजं निर्णायक गोल यात । थुपिं निगुलिं गोलय् मेसीं ‘एसिस्ट’ याःगु खः ।

क्वाटर फाइनलय् अर्जेन्टिनाया सामना जूगु खः, स्विटजरल्यान्डनाप । थ्व कासाय् थ्याक्क अर्जेन्टिनां पुनर्आगमन याःगु ला धाये मछिं । तर छगू कथं धायेगु खःसा थ्व कासाया बाखं नं थथे हे खः । निर्धारित ९० मिनेटया कासा १-१ या बराबरीइ क्वचाल, थ्व ल्याखं थुकी न्ह्याःगु नं सम्भावना दयाच्वंगु खः । तर अतिरिक्त इलय् जुलियन अल्भारेज व लाउटारो मार्टिनेजं गोल यायेवं अर्जेन्टिना ३-१ गोलं त्यात ।

थ्वयां न्ह्यः अर्जेन्टिनाया कासा जूगु खः, इजिप्टनाप । अले कासा खः, अन्तिम १६ या । थुगुसीया विश्वकपय् दकलय् विवादास्पद व सनसनीपूर्ण कासाय् थ्व नं लाः । कासा धुंकाः इजिप्टं रेर्फ्रि अर्जेन्टिनाया हे पक्षय् कासा म्हितकूगु खः धकाः आरोप तकं बीगु ज्या यात । उमिगु धापू खः- फिफाया इच्छा हे अर्जेन्टिना फाइनलय् थ्यने माः धयागु खः, अले मेसीं थ्व विश्वकप अन्त्यतक म्हिता च्वने माः धयागु खः ।

एटलान्टाय् हे जूगु थ्व कासापाखे छकः लिहां वने । उकी दकलय् न्हापां इजिप्टं निगू गोलं अग्रता काःगु खः, गुगु धाथें धायेगु खःसा अप्रत्यासित हे खः । इजिप्टया निंतिं यासिर इब्राहिम व मोस्तफा जिकों गोल यात । उबलय् ला निश्चित थें हे खने दुगु खः कि आः धाःसा अर्जेन्टिना छेँय् लिहां वनीगु जुल । तर लिसलय् क्रिस्टियानो रोमेरों अर्जेन्टिनाया निंतिं छगू गोल याये वं मेसीं मेगु गोल यात ।

कासा अतिरिक्त इलय् वने हे त्यंबलय् इन्ज्युरी इलय् इन्जो फर्नान्डेजं हाकनं छगू निर्णायक गोल यात । अथे ला कासा बुइवं इजिप्टयात तं पिहां वइगु स्वभाविक हे खः । अले थ्व झ्वलय् रेफ्रीं थः विरुद्ध अन्याय याःगु बिचाः वनीगु नं स्वभाविक हे खः । तर फुटबलय् थथे जुइमखु, छुं मखुसां रेफ्री झेल्ली याइ धकाः बिचाः याये मजिउ । नापं रेफ्रीं उगु कासाय् गुलि नं निर्णय यात, पाय्छि हे यात ।

थ्व हे विश्वकपय् डेब्यु यानाच्वंगु केपभार्डे विरुद्ध झन छु खँ ल्हाये । थ्व कासा नं अतिरिक्त ई तक वंगु खः । थ्व कासाय् अर्जेन्टिनां निक्व सुरुआती अग्रता काल, तर प्रत्येक इलय् केपभार्डें बराबरी गोल यात । अन्ततः कासा अतिरिक्त इलय् वन, गुकी एडिल्सनया आत्मघाती गोलं अर्जे न्टिना त्यात । थुकथं अर्जेन्टिना दुःखसियाः हे फाइनल तक थ्यंगु धाःसां जिउ ।

आः फाइनलय् वं म्हितीगु जुइ, स्पेनविरुद्ध । अर्जेन्टिना विश्वकपया फाइनलय् थ्यंगु थ्व झ्वलाक निक्वःगु खुसी खः । सन् २०२२ य् अर्जेन्टिनां विश्वकप त्याके धुंकाः आः हाकनं छक्व फाइनल म्हिते त्यंगु दु, अले थुकिया हे झ्वलय् मेसीया अद्वितीय कासा जीवनय् मेगु छगू बांलाःगु अध्याय स्वाःगु दु । सकसिनं सिउ, मेसी आधुनिक विश्व फुटबलया दकलय् बांलाःम्ह कासामि खः । अझ वयात विश्व फुटबलया सर्वकालीन महान कासामि तकं धायेगु याः । मेसी आः गुकथं म्हिताच्वंगु दु, अले व हे कासाया लिधंसाय् अर्जेन्टिना गुकथं फाइनल थ्यंगु दु, मेसीया प्रतिष्ठा अझ झन् थहांवंगु दु । मेसी अज्याःम्ह कासामि जूगु दु, गुम्हे सिया कासा स्वये खंगु हे तःधं । अर्जेन्टिना थ्व पालय् ‘द कमब्याक किंग’ जुयाच्वंगु दुसा मेसी थुकिया निर्माणकर्ता ।