स्टोक्सया अजूचायापुगु संन्यास
इंग्लिस कप्तान बेन स्टोक्सं विश्व क्रिकेटय् अज्याःगु हे जक ज्या यात धाःसां जिउ, गुगु ई सिबें गाक्कं न्ह्यःने ला । अझ धाये, वं छु याइ उकिं सकसितं अजुचाये की । नकतिनि हे वं ज्याःगु हे छगू ज्या याःगु दु, व खः– अन्तर्रााष्ट्रिय क्रिकेटपाखें संन्यास । संन्यास नं गज्याःगु धाःसा आवलिं वं छुं कथंया अन्तर्रााष्ट्रिय क्रिकेट म्हिती मखुत, छक्वलं तना वनीगु कथं ।
थःगु थ्व हे संन्यास औ पचारि क ल्याखं घोषणा याये त वं छ्यगु खँग्वःत खः, ‘वेँय्हू वःगु झिन्यादँ । झीसं क्रिकेटय् वेँय्हू धाये बलय् भचा अनर्थ जुइफु, तर अंग्रेजीं पाय्छिनक्सां धायेबलय् जुइ, ‘ म्याड फिफ्टिन इयर्स’ । थथे छाय् धाःसा स्टोक्सं विश्व क्रिकेट १५ दँ म्हितल, अले उकिया झ्वलय् सकसितं अजुचाये कीगु ज्या हे जक याना जुल ।
छगू कथं अप्रत्यासित ल्याखं वया संन्यासया घोषणा वये न्ह्यः इंग्ल्यान्ड व न्युजिल्यान्ड दथुइ स्वंगू टेस्टया सिरिज जुयाच्वंगु खः । अन्तिम टेस्ट ट्रेन्ट ब्रिजय् जूगु खः । वयां न्ह्यःया न्हापांगु टेस्ट इंग्ल्यान्डं त्याकलसा निगूगु टेस्ट न्युजिल्यान्डं । अन्तिम टेस्टय् न्युजिल्यान्ड त्याये वं इंग्ल्यान्ड सिरिजय् बुत । थ्व हे टेस्टया प्यन्हु कुन्हु खः, स्टोक्सं थःगु संन्यासया घोषणा याःगु ।
लर्डसय् जूगु न्हापांगु टेस्ट त्यायेवं इंग्ल्यान्डया आत्मविश्वास हे मेगु जूगु खः । तर ओभलय् जूगु निगूगु टेस्टय् धाःसा वं म्हिते मखं । अनुशासनया कारवाहिलय् लायेवं व निगूगु टेस्टपाखें पिने लाःगु खः । लन्डनया छगू नाइट क्लब वनेगु झ्वलय् वं टिमया नियम हाचां गाःगु खः, चान्हय् कासामित गनं पिहां मवनेगु । थुकिया झ्वलय् व हाकनं छक्व विवादय् तक्यंगु खः ।
नटिंघम टेस्ट म्हिते न्ह्यः वयात कडा ख्याच्वः नं बिउगु खः, आवंलि थथे अनुशासन हाचां गायेगु ज्या याये दइमखु धकाः । व हे ख्याच्वःया लिसः कथं वं अखतं घोषणा याना बिल, ‘आवलिं अन्तर्राष्ट्रिय क्रिकेट हे म्हिते मखु, जिं ला संन्यास कयाः ।’ थ्व निर्णयपाखें वया कासामि पासापिं व इंग्लिस क्रिकेटया समर्थकत गुलि अजूचाःगु दु, उलि हे स्तब्ध ला इंग्लिस क्रिकेट बोर्ड नं जूगु जुइमाः ।
थःगु ‘एक्स’ य् संन्यासया घोषणा यायेगु झ्वलय् वं दकलय् न्हापां थःत ग्वाहालि याःपिं जक मखु, समर्थन याःपिं सकसितं सुभाय् बिउगु खः । अनंलि वं च्वःगु दु, ‘जिं इंग्ल्यान्डया निंतिं अन्तर्राष्ट्रिय क्रिकेट म्हितागु नं झिंन्यादँ दत । थुकिया झ्वलय् जिं सकतां कथंया स्थिति खना, तसकं ततःधंगु सफलतानिसें तसकं तसकं म्हाइपुगु स्थिति नं, मैदान दुने व पिनें निथासं ।’
वं न्ह्यःने च्वःगु दु,, ‘आः जिगु अन्तर्राष्ट्रिय क्रिकेट म्हितेगु ई क्वचाल । अले थ्व संन्यासया निर्णय याइम्ह नं ला जि हे खः, मेपिं मखु । इंग्ल्यान्डया कासामि जुयाः जिं गुलि नं म्हिताः, वं सकतां न्ह्याब्लें जिगु नुगलय् दयाच्वनी, गुबलें हुयामवनीगु कथं । जिगु निंतिं इंग्ल्यान्डया नितिं म्हिते खंगु हे तःधं ।’ वया कथं वं डरहमया नितिं धाःसा अझं छुं दँ तक म्हितां तुं च्वनी ।
थौंकन्हय् ३५ दँ क्यना च्वंम्ह स्टोक्स कासाया ल्याखं थःगु उत्कृष्ट इलय् अब्बल दर्जाका अलरााउन्डर खः, गुम्हे सिनं ब्याटं जक मखु, बलं नं थःगु टिमयात बराबर योगदान यायेफु । इंग्ल्यान्डं सन् २०१९ य् वान डे क्रिकेटया विश्वकप त्याकूगु खः, लर्डसय् जूगु फाइनलय् न्युजिल्यान्डयात बुकाः । अनलिं सन् २०२२ य् इंग्यान्डं ट्वान्टी ट्वान्टी क्रिकेटया विश्वकप नं त्याकल ।
थुपिं निगुलिं विश्वकपय् इंग्ल्यान्डया नितिं उत्कृष्ट म्हितूम्ह कासामिया धलखय् वया हे नां न्ह्यःने लाः । थुकिं नं क्यं व गुलि बांलाःम्ह कासामि खः धकाः । थुपिं नापनापं वयात अन्तर्राष्ट्रिय क्रिकेटय् ताः ई तकं लुमंकीगु धयागु मेगु हे कारण दु । व खः थः इंग्ल्यान्डया टेस्ट कप्तान जुइवं वं ल्यःगु आक्रामक रणनीति । व कप्तान जुयाच्वंगु इलय् हे इंल्यान्डया प्रशिक्षकय् ब्रेन्डन म्याकलम वल ।
थ्व खँ जुल, सन् २०२२ या । थुबलय् निसें इंग्ल्यान्डं थुकथं आक्रामक जुयाः टेस्ट क्रिकेट म्हितल कि सुना नं थ्व पारम्पिरिक मू क्रिकेटया स्वरूप थथे नं म्हिते जिउ धकाः बिचाः तकं मयाः । वया नेतृत्वय् इंग्ल्यान्डं वान डे कथं जक मखु, ट्वान्टी ट्वान्टी कथं हे टेस्ट क्रिकेट म्हितूगु खः । थुकिया झ्वलय् विपक्षी टिमविरुद्ध चौका व छक्का जक थ्वानाः आक्रामक ब्याटिङ यायेगु ज्या जुल ।
थ्व हे शैलीं म्हिताः इंग्ल्यान्डं छुं टेस्ट व सिरिज नं त्याकल । तर थ्व पहः लिपा वनाः तसकं असफल नं सावित जुल । विपक्षी टिमं इंग्ल्यान्डयात अःपुक हे बुका हल । अले धाये गु सुरु जुल– न्यान्हु तक भचा संयमित हे जुयाः म्हिते माःगु टेस्ट क्रिकेट थथे आक्रामक जुयाः म्हितेगु हे मखु । तर न्ह्याक्वः विरोध जूसां स्टोक्सं मे पिनिगु खँ गन न्यं धकाः ?
आः थ्व हे स्टोकं अन्तर्राष्ट्रिय क्रिकेटपाखें संन्यास काये वं थ्व कासाया छगू अध्याय क्वचाःगु दु । वया नेतृत्वय् इंग्ल्यान्डं गुकथं टेस्ट क्रिकेट म्हितल, उकिं थ्व कासा थथे नं म्हिते जिउ धयागु दसु धाःसा बियावन । सायद वया पहः ई सिबें भचा यक्व हे न्ह्यःने या जुल जुइमाः । छन्हु अज्याःगु नं न्हि वयेफु, गुबलय् टेस्ट क्रिकेट म्हितेगु धात्थें या पहः अथे हे जुइफु, गथे स्टोक्सं बिचाः याःगु खः ।
LEAVE YOUR COMMENTS