रुसया चिकं प्रशोधन केन्द्रय् आक्रमण

मस्को – युक्रेनं आइतवाः रुसया दक्षिण पश्चिम क्षेत्रय् ड्रोन आक्रमण याःगु दु । आक्रमणय् लानाः छम्ह सीगु दुसा मेपिं स्वम्ह घाःपाः जूगु दु । घाःपाः जूपिंमध्ये छम्ह मचा नं लाःगु रुसया समारा क्षेत्रया गभर्नर ब्याचेस्लाभ फेदोरिश्चेभं धाःगु दु ।

युक्रेनं याःगु ड्रोन आक्रमणया कारणं उगु लागाया छुं छेँ, अपार्टमेन्ट व औद्योगिक स्थलय् क्षति जूगु नं धाःगु दु । रुसी संचार माध्ययमकथं युक्रेनं मुख्य रुपं सिज्रान चिकं प्रशोधन केन्द्रयात लक्षित यानाः उगु आक्रमण याःगु खः । उगु चिकं प्रशोधन केन्द्र रुसया छगू तःधंगु चिकं व ग्यास कम्पनीया स्वामित्वय् दुगु खः । आक्रमण लिपा चिकं प्रशोधन केन्द्रं तसकं ख्वातुक कुँफः दनाच्वंगु खनेदुगु संचार माध्यमतय्सं न्ह्यथंगु दु ।

युक्रेनं लिपांगु इलय् रुसया चिकं भण्डारण, प्रशोधन, इन्धन भण्डारण केन्द्रलिसें मेमेगु थीथी उर्जा पूर्वाधार केन्द्रयात लक्षित यानाः ड्रोन आक्रमण याना वयाच्वंगु दु । युक्रेनं थुकथं उर्जा पूर्वाधार यात लक्षित यानाः यानाच्वंगु आक्रमणया कारणं रुसय् पेट्रोलियम पदार्थया अभाव खनेदया वयाच्वंगु दु । छुं छुं थासय् इन्धन वितरणया सीमा हे क्वःछिनातःगुलिं सवारी चालकत पेट्रोल कायेत घन्टौं झ्वःछुना च्वनेत बाध्य जुयाच्वंगु दु ।

थुखे रुसया रक्षा मन्त्रालयं आइतवाः युक्रेनया ओडेसा व चोर्नोमोर्स्क बन्दरगाहय् याःगु हवाई आक्रमण सफल जूगु दावी याःगु दु । युक्रेनी अधिकारीतय्सं धाःसा थ्व बारे छुं प्रतिक्रिया बिउगु मदुनि ।