
एजेन्सी – नेदरल्यान्डया छम्ह ह्याकरं पासवर्ड अनुमान यानाः हे अमेरिकी राष्ट्रपति डोनाल्ड ट्रम्पया ट्विटर खाता दुने दुहां वंगु खँ अमेरिकी अधिकारीतय्सं धाःगु दु। ट्रम्पया पासवर्ड “maga2020!” यात अनुमानया भरय् उम्ह ह्याकरं सिइकूगु खः । तर नैतिकतापूर्वक ज्या याःगुलिं भिक्टर गेभर्स नांया उम्ह ह्याकरयात कारवाही धाःसा मयाःगु खँ धाःगु दु ।
अमेरिकाया राष्ट्रपतिय निर्वाचनया अन्तिम चरणपाखे अक्टोवर २२य् गेभर्सं ट्रम्पया ट्विट दुने दुहां वनाः स्क्रीनसट कयाः सार्वजनिक यानाबिउगु खः । उबलय् धाःसा ह्वाइट हाउसं ह्याक जूगु दाबीयात अस्वीकार याःगु खः । ट्विटरं नं अज्याःगु दावी पुष्टि याइगु छुं नं प्रमाण थःपिंके मदु धकाः धाःगु खः । तर आः धाःसा ट्रम्प व ट्विटर निम्हेसिनं छुं प्रतिक्रिया बिउगु मदुनि ।
गेभर्सं न्हापां सार्वजनिक याःगु स्क्रीनशटय् ट्रम्पया ट्विटर प्रोफाइलय् दुहां वनाः सम्पादन यायेत्यंगु खनेदु । गेभर्स साइबर सुरक्षाया क्षेत्रय्अ नुसन्धान याना वयाच्वंम्ह खः । वय्कलं धाःगु दु, ‘थ्व जिगु ज्याया खँ जक मखु, इन्टरनेटय् दुगु कमजोर पक्षयात स्वइपिं सकलें स्वयंसेवकतय् खः ।’ वय्कःया कथं अमेरिकाया राष्ट्रपतिय निर्वाचनया इल्य् ततःधंपिं उम्मेदवारतय् ट्विटर खाता इलय् ब्यलय् निगरानी तयेगु यानाच्वंगु खः । थ्व हे झ्वलय् अक्टोवर १६ य् ट्रम्पया पासवर्ड लूगु वया धापू दु ।
डच प्रहरीया कथं गभर्स थम्हं हे थुगु घटनाबारे जानकारी बिउगु खः । वय्कलं प्रहरीयात राष्ट्रपतिय चुनावया इलय् ट्विटर एकाउन्ट ह्याक यायेत यक्वस्यां स्वयाच्वंगु अवस्थाय् पासवर्ड गुलि तक सबल दु धकाः अनुसन्धान यानागु धाःगु खः । डच प्रहरी थःपिंत वःगु जानकारी अमेरिकी निकाययात बिउगु खः ।
LEAVE YOUR COMMENTS