खोटाङय् वृहत लाखे प्याखंया प्रदर्शन
येँ(नेपालभाषा टाइम्स)÷पहाडी जिल्ला खोटाङया प्रमुख व्यापारिक केन्द्र दिक्तेल बजारय् वृहत रुपय् लाखे प्याखंया प्रदर्शन याःगु दु । दिक्तेल बजार सामाजिक गुथिया ग्वसालय् दिक्तेलया थीथी थासय् वृहत रुपय् लाखे प्याखं क्यंगु खः ।
जिल्लाया थीथी थासय् च्वंपिं नेवाः समुदायत मुनाः दिक्तेल, सोल्मा, खाल्ले, बुइपा, खार्मी, राजापानी लगायतया थासय् नेवाःतय् ख्वातुगु बसोबास दया वयाच्वंगु दु । दिक्तेल बजाःया किरात चोकं शुरु जूगु लाखे प्याखं प्रदर्शन रत्नपार्क, बेसक्याम्प, त्रिवेणीचोक, शङ्खधर साख्वाः चोक जुयाः हाटडाँडाय् थ्यंकाः क्वचाःगु खः ।
दिक्तेल बजार सामाजिक गुथिया नायः विष्णुकुमार श्रेष्ठं थवंथवय् भाइचारालिसें मौलिक संस्कृति संरक्षणया निंतिं लाखे प्याखं प्रदर्शनया ग्वसाः ग्वयागु जानकारी बियादिल । गुथिया ग्वसालय् दँय्दसं लाखे जात्राया अवसर लाकाः दिक्तेल बजारय् थुकथं वृहत लाखे प्याखंया प्रदर्शन याना वयाच्वनागु नं वय्कलं कनादीगु दु ।
नागपंचमिया दिंनिसें न्ह्याइगु थनया लाखे प्याखं कृष्ण जन्माष्टमितक न्ह्याइगु व लिपांगु इलय् लाखे प्याखय् नेवाःलिसें मेमेगु समुदाययापिनिगु सहभागिता नं गाक्कं दया वयाच्वंगु वय्कलं कनादिल ।
झिगू स्थानीय तह दुगु जिल्लाया अधिकांश थासय् च्वना वयाच्वंपिं नेवाःतय्सं लाखे जात्राया अवसरय् पितृ कार्यया ज्या यायेगु नापं थवंथवय् भिंतुना कालबिल नं यायेगु नं चलन दुगु नेवाः मुक्ति मोर्चा खोटाङया जिल्ला अध्यक्ष सुमन श्रेष्ठं कनादिल ।
LEAVE YOUR COMMENTS