विश्व साहित्य दबुली नेपालभाषाया उपन्यास
येँ (नेपालभाषा टाइम्स)/ क्यानाडाया क्वान्टलेन पोलिटेक्नीकल विश्वविद्यालय, दक्षिण एसियाली साहित्य व अनुसन्धान प्रतिष्ठानया ग्वसालय् जूगु ‘विश्व साहित्य दबुली नेपाःया साहित्य’ शिर्षकया अन्तरराष्ट्रिय संगोष्ठी व सेमिनारय् नेपालभाषाया उपन्यास ‘सेप्टेम्बर – १७’ व ‘कोरनाया किचलय्’ यात कयाः छगू बिशेष सत्रया सहलह जूगु दु ।
संयुक्त राज्य अमेरिका, ओरेगन राज्य पोर्टलैण्ड रीड कालेजया मानविकि व अंग्रेजी साहित्यया सहायक प्राध्यापक क्रिटिस राजभण्डारीं नेपालभाषाया थुगु निगू उपन्यासयात कयाः विश्व आख्यान साहित्य ख्यलय् थुमिगु थाय् छु जुइफु धैगु छगू दुग्यंगु कार्यपत्र न्ह्यब्वयादीगु खः । संसारया तःगू देय्या विद्वान, विज्ञ, च्वमिपिंसं भौतिक रुपय् व अनलाइनय् ब्वति काःगु थुगु ज्याझ्वः थ्वहे अगष्ट २७ व २८ निन्हुयंक जूगु खः ।
नेपालभाषाया उपन्यास ‘सेप्टेम्बर – १७’ भाजु मल्ल के. सुन्दर व ‘कोरनाया किचलय्’ मय्जु श्रीलक्ष्मी श्रेष्ठया च्वसां पिदंगु खः । नेपालभाषा साहित्यया विज्ञपिनि धापू कथं थुकथं नेपालभाषा आख्यान विधायात कयाः अन्तर्राष्ट्रिय साहित्यिक दृष्टिकोणं नेपालंपिने बौद्धिक ख्यलय् सहलह जूगु थ्व न्हापां जुइ ।
उगु विश्वविद्यालयया दक्षिण एसियाली साहित्य व अनुसन्धान प्रतिष्ठानया नकिं डा. आस्मा सैयदया नेतृत्वय् न्ह्याःगु थुगु ज्यायात विश्वविद्यालयया समाज विज्ञान व मानविकी अनुसन्धान परिषदपाखें विशेष आर्थिक तिबः चूलाकूगु खः ।
थीथी झिंनिगू सत्रय् ब्वथलाः न्ह्याकूगु ‘विश्व साहित्य दबुली नेपाःया साहित्य’ विषयक ज्याझ्वलय् नेपालभाषा साहित्ययात कयाः मल्लकालीन नेवाः साहित्य (इस्वी १२००–१८०० तक), नेवाः बौद्ध अवदान केन्द्रीय बौद्ध साहित्य, कविकेशरी चित्तधर हृदयया ‘पौ’ न्हूबाखं व उकिया अंग्रेजी भाय् हिलायात कयाः नं बिस्कं बिस्कं सत्रय् ज्यापौत न्ह्यब्वयेगु अले सहलहया ज्या जूगु खः ।
अथेहे नेपाली भाय्या महाकाब्य विधाय् महाकवि लक्ष्मीप्रसाद देवकोटाया ‘मुनामदन’ व ‘शकुन्तला’या अंगे्रजी भाय् हिलाया नापनापं बालकृष्ण समया प्याखं सफूयात कयाः नं बिस्कं बिस्कं सहलह न्ह्याकूगु खः । अथेहे इन्द्रबहादुरया लिला लेखन, पारिजातया शिरिषको फूलया अंग्रेजी भाय् हीका अले शरद पौडयालया ‘लिखे’ उपन्यासया लिधंसाय् नेपाःया जात व्यवस्थायात कयाः नं कुलेगु ज्या जूगु खः ।
थुगु बौद्धिक ज्याझ्वःया सहलह अले ज्यापौत दुथ्याकाः याकनं छगू सफू हे पिथनीगु खँ नं ग्वसाः खलकं धाःगु दु ।
LEAVE YOUR COMMENTS