निजी स्कुलतय्त नेपालभाषा प्रशिक्षण

येँ -येँ महा–नगरपालिकापां थ्वहे दँनिसें ब्वंकेगु शुरु याःगु स्थानीय विषयया पाठ्यक्रम ‘येँ देय् म्हसीके’ या शिक्षण सम्बन्धी तालिम म्हिगःनिसें न्ह्याकूगु दु । छवाः तक न्ह्याइगु थ्व तालिम आःयात निजी विद्यालयया शिक्षकतय्त बिउगु खः ।

म्हिगः येँ मनपा शिक्षा विभागया प्रमुख रामप्रसाद सुवेदीया सभापतित्वय् जूगु ज्याझ्वलय् तालिमया उलेज्या जूगु खः । ज्याझ्वलय् न्ववासें विभाग प्रमुख सुवेदीं स्वनिगः दुने नेपालभाषाया शिक्षण ज्यां नेवाः बिसें नं गैर नेवाः समुदायं अप्वः लबः काये फइ धासें शिक्षकतय्सं थुकियात रोचक ढंगं ब्वंकेमाःगु खँय् बः बियादिल ।

विभागया अधिकृत मोतिराज खनालं लसकुस यानादीगु उगु ज्याझ्वलय् येँ मनपा शहरी योजना आयोगया कामु उपाध्यक्ष गुजेश्वरी श्रेष्ठ, मू प्रशिक्षक वरुणप्रसाद वैद्यपिंसं न्ववानादीगु खः । थुकी २९ गू निजी विद्यालयया ३२ म्ह शिक्षकतय्सं ब्वति कयाच्वंगु दु ।