खोनाया स्थानीय राज्य व्यवस्था समितिइ

येँ – खोनाया स्थानीय वासिन्दां सरकारं दयेकाच्वंगु फास्ट ट्य्राक दयेकेगु ज्या तत्काल दिके बिइकेत संसदया राज्य व्यवस्था समितियात इनाप याःगु दु । सोमवाः राज्य व्यवस्था समितिया बैठकय् हे वनाः स्थानीय वासिन्दां थःपिनिगु माग न्ह्यब्वःगु खः । सेभ नेपाल भ्यालीया नेतृत्वय् वंगु पुचलं उगु माग याःगु खः ।

राज्य व्यवस्था समितिलिसे सहलह यायेगु झ्वलय् स्थानीय वासिन्दां खोनाया परम्परागत बस्ति व संस्कृतियात संरक्षण यानाः जक फास्ट ट्य्राक दयेकेमाः धाःगु खः ।राज्य व्यवस्था समिति लिसे जूगु सहलह ज्याझ्वलय् न्ववायेगु झ्वलय् यल महानगरपालिका २२ वडाया वडाध्यक्ष अमृतराज शाक्यं स्थानीय जनताया माग सम्बोधन यानाः जक फास्ट ट्य्राक दयेकेमाःधयादीगु खः ।

नेवाः संस्कृतिया उद्गम स्थल जुयाच्वंगु उगु क्षेत्रया जनतायात पेले यानाः वनेत्यंगु धासें शाक्यं आपत्ति प्वंकादीगु खः । स्थानीय जनतां फास्ट ट्य्राकया जिरो प्वाइन्ट बुंगय् तयेत थःपिं तयार दुसां नं सरकार उकियात कार्यान्वयन यायेत चाहे मजूगु द्वपं बिउगु दु ।

सेभ नेपाल भ्यालीया संयोजक असोज महर्जनं ‘नेपालभाषा टाइम्स’ लिसे खँ ल्हासें राज्य व्यवस्था समितिं सरकारयात माःगु निर्देशन बी धकाः आश्वासन बिउसां थःपिं विश्वस्त जुइमफुगु खँ धयादीगु दु । राज्य व्यवस्था समितिइ न्ववायेगु झ्वलय् सांसदपिंसं नं फास्ट ट्य्राक दयेकेगु ज्या तत्काल दिकेमाः धाःगु खः । फास्ट ट्य्राकया डीपीआर हे मदयेकुसे लँ दयेकाच्वंगु धासें सांसदतय्सं तत्काल निर्माण ज्या दिकेमाःगु माग याःगु खः ।

समितिइ सांसदतय्सं थ्व विषयय् प्रधानमन्त्री केपी ओली शर्मा व रक्षामन्त्री ईश्वर पोखरेलयात सःताः सहलह यायेमाःगु माग नं याःगु खः । सांसद दिलेन्द्रप्रसाद बडुं तत्काल निर्माण ज्या दिकाः सहलह मयायेगु खःसा समस्या अझ तच्वयावनी धासें समितिया ध्यानाकर्षण यानादीगु खः ।

अथेहे मेम्ह सांसद राजेन्द्र श्रेष्ठं फास्ट ट्य्राक दयेकेगु ज्याय् सेना संलग्न जुयाच्वंगुलिं अझ हे विवाद ब्वलने फइ धासें थुकी थप सहलह आवश्यक जूगु खँ धयादीगु खः । समितिया सभापति शशी श्रेष्ठं थ्व विषययात कयाः आन्तरिक सहलह लिपा रक्षामन्त्रीयात सःताः सहलह यायेगु जानकारी बियादिल । वय्कलं फास्ट ट्राय्कया बारे सरकारयात माःगु निर्देशन बीगु बचं नं बियादीगु दु ।

थ्व स्वयां न्ह्यव नं राज्य व्यवस्था समितिया सभापति शशी श्रेष्ठया नेतृत्वय् वंगु पुचलं फास्ट ट्य्राकया स्थलगत अध्ययन यानाः सम्बन्धित निकाययात निर्देशन बीगु धकाः धाःगु खःसां नं आः तक सहलह धाःसा मयानिगु खँ स्थानीय वासिन्दां धाःगु दु । स्थलगत भ्रमणया इलय् नं समितिं तत्काल सरकारयात माःगु निर्देशन बी धकाः आश्वासन बियाथकूगु खः ।