पत्रकारितायात नियन्त्रण मखु, कडा नियमन यायेमाः – राज्यमन्त्री

येँ – संचार व सूचना प्रविधि राज्यमन्त्री गोकुल बास्कोटां प्रेस काउन्सिल, नेपालयात सशक्त नियमनकारी निकायया रुपय् स्थापित याना यंकेमाःगु खँ धयादीगु दु । मन्त्री बास्कोटां प्रेस काउन्सिलयात संघीय ढाँचाय् पुनःसंरचना यायेमाःगु नापं काउन्सिलया ज्याथ जुइधुंकूगु ऐनयात तत्काल संशोधन यायेमाःगु खँ धयादीगु दु ।

राज्यमन्त्री बास्कोटां प्रेस काउन्सिल नेपालं अवलोकन भ्रमण लिपा जूगु सहलहया इलय् पत्रकारिताय् कर्तव्य, अधिकार व मर्यादायात नं नापनापं यंकेमाःगु व पत्रकारिता ख्यःयात नियन्त्रण मखसे कडा नियमन यायेमाः धासें लाक्वपाक्व खँ ल्हानाः पत्रकारिता जुइ फइमखु धयादिल ।

प्रेस पासया दुरुपयोग जुयाच्वंगुयात व्यवस्थित यायेमाःगु, विधिया शासनय् मनूया ख्वाः स्वयाः व्यवहार याये मिले मजू धासें वय्कलं धयादिल, ‘जिगु हे पार्टीया जूसा नं त्वःतादीमते, तथ्यय् आधारित जुयाः पैmसला यानादिसँ, छाय्कि सत्यं सकसियां न्ह्यःने छ्यं क्वछुइ, सत्य गबलें नं सुचुके फइमखु । झी अझ नं परिवर्तनया संघर्षय् दु ।’

पत्रकारिताया ख्यलय् ताःहाकःगु अनुभव कयादीम्ह राज्यमन्त्री बास्कोटां लिपांगु इलय् थः नं छुं छुं मिडियापाखें अवान्छित व अतिरञ्जित द्वपंया शिकार जुयाच्वंगु नं न्ह्यथनादीगु खः ।

सहलहया इलय् प्रेस काउन्सिल नेपालया कार्यवाहक अध्यक्ष किशोर श्रेष्ठं प्रेस काउन्सिलया क्षेत्राधिकार हाचां गायाः अदालतं प्रेस स्वतन्त्रताया नामय् उदारता क्यनाः आचारसंहिताया गम्भिर उल्लंघन याःपिं अराजक व्यक्तिं मुक्ति काःगु धयादिल । अथे खःसां आपालं संचारमाध्यमं काउन्सिलया कामकारवाहीप्रति सकारात्मक प्रतिक्रिया बिउगु श्रेष्ठं धयादिल ।

काउन्सिलया पुनःसंरचना यानाः प्रादेशिकस्तरय् विस्तार यायेगु व काउन्सिलपाखें हे प्रेस पास बीगु व्यवस्थाया निंतिं कानुनी प्रावधान निर्माण यायेग प्रक्रियाय् काउन्सिल न्ह्याः वनाच्वंगु दु । उगु इलय् काउन्सिलया निमित्त मुख्य अधिकृत दीपक खनालं काउन्सिलया संक्षिप्त ज्यापौ न्ह्यब्वयादीगु खः ।

सम्बन्धित बुखँ

LEAVE YOUR COMMENTS