छायादेवी कम्प्लेक्सया अन्तिम फैसला मंसिर २४ गते छेँ थुनेमाःगु दावी अझ क्वातुल

येँ (नेपालभाषा टाइम्स)÷थनया थँबहिली च्वंगु विवादास्पद छायादेवी कम्प्लेक्सया सम्बन्धय् सर्वोच्च अदालतं थ्वहे वइगु मंसिर २४ गते अन्तिम फैसला न्यंकीगु जूगु दु । सर्वोच्चपाखें थुकिया जानकारी बिउगु खः । अन्तिम निर्णय न्यंके न्ह्यः थुकी बहस याःपिं फुक्क वकिलतय्त बहस नोट बुझे याये हजि धकाः सुचं नं बीधुंकूगु दु ।

सर्वोच्चया निर्देशन कथं थुकी बहस याःपिं निगुलिं पक्षं थःथःपिनि बहस नोट सर्वोच्चय् बुझे यायेधुंकूगु दु । आः थ्व स्वयाः सर्वोच्चं निर्णय जक न्यंके ल्यं दनिगु खँ धाःगु दु ।

थुकी आः तक न्ह्यानाच्वंगु बहसय् सरकार पक्षं वकालत यानाच्वंपिं महान्यायाधिवक्ताया कार्यालय लिसें गुथि संस्थानं नं छायादेवी कम्प्लेक्स सार्वजनिक सम्पत्तिइ दनातःगु छेँ खः धासें थःगु धापू तयेधुंकूगु दु । गुथि संस्थानं नं थ्व थाय् गुथि अन्तर्गत लानाच्वंगु सार्वजनिक जग्गा जूगु कारणं अन कालबिल यानाः मेलमिलाप जुइ फइगु खँ धाःगु दु । थ्व जग्गा निजी खः धकाः गुथि संस्थानं न्हापा बिउगु लिसः गलत खः धासें उकियात सुधार याये माःगु खँ समेत संस्थानं स्वीकार याःगु दु । गुथिं न्हापा बिउगु लिसः गलत जूगुलिं उकियात संशोधन यायेगु लागिं सर्वोच्चं आदेश बी फइगु खँ नं गुथिं धाःगु दु ।

थ्व जग्गाय् केयूर शमशेरया नां मोही धकाः उल्लेख यानातःगु दु । लिपा अन नांजाःम्ह बैंकर पृथ्वीबहादुर पाण्डें थः मां छायादेवी पाण्डेया नामं अन भवन निर्माण याःगु खः । तर अदालतय् थ्व जग्गाया मोही कथं केयूर शमशेरया नां गय् यानाः वल धकाः नं न्ह्यसः पिहां वःगु दु । मोही जुइगु लागिं केयूर शमशेर कि मखुसा किसान जुइ माल, कि मखुसा गुथियार जुइमाल । छुं हे मखुम्ह मनू मोही जूगु धइगु अनया गुथियारतय्त प्रभावित यानाः नां दुथ्याकूगु प्रमाणित जुइ धासें वयागु मोहियानी हक खारेज जुइमाःगु माग समेत जूगु दु ।

लुमंकेबहः जू, छायादेवी कम्प्लेक्स परम्परागत पुखू म्हासे यानाः दयेकूगु धासें थ्व छेँ थुनाः अन पुखू हे कायम जुइमाःगु माग सहित सम्पदा अभियन्ता भागवत प्रधानं रिट तःगु खः । छायादेवी कम्प्लेक्सय् थीथी विदेशी संस्थातय्सं पसः व होटल चायेकातःगु दु । राष्ट्र संघया मानव अधिकार निकायं सम्पदास्थल मासे यानाः दनातःगु छेँय् सुं नं विदेशीं व्यापारिक कारोवार याये मते धकाः सुचं नं जारी यायेधुंकूगु दु ।